Read Ndebele-IBhayibhili Elingcwele 2006 Ujobho 16 Bible Online

Ujobho 16 - Ndebele-IBhayibhili Elingcwele 2006 bible

Ujobho 16

¹Wasephendula uJobe wathi:

²Ngizwile izinto ezinengi ezinje; lingabaduduzi abakhathazayo lina lonke.

³Kuzakuba lesiphetho yini emazwini angumoya? Kumbe kuyini okulicunulayo ukuthi liphendule?

⁴Lami bengingakhuluma njengani uba umphefumulo wenu ubusendaweni yomphefumulo wami; bengingabuthelela amazwi phezu kwenu, ngilinikinele ikhanda lami.

⁵Bengingaliqinisa ngomlomo wami, lokunyikinyeka kwendebe zami bekungazithiba.

⁶Uba ngikhuluma, ubuhlungu bami kabudedi; uba ngiyekela, kuyini okusuka kimi?

⁷Kodwa khathesi ungidinisile yena, wena uchithile yonke inhlangano yami.

⁸Ungicindezele, kube yibufakazi, lokucaka kwami kungivukele, kuyafakaza ebusweni bami.

⁹Ulaka lwakhe luya ngi dwengula, njalo uyangizonda; ungigedlela amazinyo akhe; isitha sami singicijisela amehlo aso.

¹⁰Bangikhamisela umlomo wabo, bangiwakala esihlathini ngokuyangisa, bengihlanganyela ndawonye.

¹¹UNkulunkulu unginikele kokhohlakeleyo, wangiphosela ezandleni zababi.

¹²Ngangonwabile, kodwa wangichoboza, wangidumela ngentamo, wangiphahlaza, wangimisa ngaba yinto yakhe yokunenjwa.

¹³Abatshoki bakhe bangigombolozela; uqhekeze izinso zami, engayekeli, wachithela emhlabathini inyongo yami.

¹⁴Wangivodloza ngokuvodlovodloza, wagijimela kimi njengeqhawe.

¹⁵Ngathunga ilembu lesaka phezu kwesikhumba sami, ngathukuza uphondo lwami othulini.

¹⁶Ubuso bami bubomvu ngokukhala, lenkotsheni zami kulethunzi lokufa,

¹⁷lanxa kungekho isihluku ezandleni zami, lomkhuleko wami uhlanzekile.

¹⁸Mhlaba, ungaligqibeli igazi lami, lokukhala kwami kakungabi landawo.

¹⁹Lakhathesi, khangelani, ubufakazi bami busemazulwini, lomfakazi wami usezindaweni eziphakemeyo.

²⁰Abangane bami bayangiklolodela; ilihlo lami liyathonta kuNkulunkulu.

²¹Kungathi kungaba khona ongamlamulela umuntu kuNkulunkulu, njengendodana yomuntu kumngane wayo.

²²Ngoba iminyaka emilutshwana izafika, ng’khona ngizahamba nge ndlela engingayikubuya ngayo.