Read Ndebele-IBhayibhili Elingcwele 2006 Ujobho 2 Bible Online

Ujobho 2 - Ndebele-IBhayibhili Elingcwele 2006 bible

Ujobho 2

¹Kwakulosuku futhi lapho amadodana kaNkulunkulu afika ukuzimisa phambi kwe Nkosi, uSathane laye wafika phakathi kwawo ukuzimisa phambi kwe Nkosi.

²I Nkosi yasisithi kuSathane: Uvela ngaphi? USathane wasephendula i Nkosi wathi: Ekuzulazuleni emhlabeni lekuhambahambeni kuwo.

³I Nkosi yasisithi kuSathane: Ubekile yini inhliziyo yakho encekwini yami uJobe? Ngoba kakho onjengaye emhlabeni, umuntu opheleleyo loqondileyo, owesaba uNkulunkulu, loxwaya ububi? Usabambelele kubo ubuqotho bakhe, lanxa ungivuse ukuze ngimmimilize kungelasizatho.

⁴USathane wasephendula i Nkosi wathi: Isikhumba ngesikhumba, yebo, konke umuntu alakho uzakunikelela impilo yakhe.

⁵Kodwa khathesi yelula isandla sakho, uthinte ithambo lakhe lenyama yakhe; isibili uzakuthuka ebusweni bakho.

⁶I Nkosi yasisithi kuSathane: Khangela, usesandleni sakho; kodwa gcina impilo yakhe.

⁷USathane wasephuma phambi kwe Nkosi, wamtshaya uJobe ngamathumba amabi, kusukela ngaphansi konyawo lwakhe kuze kube enkanda yakhe.

⁸Wasezithathela udengezi ukuziphala ngalo, wahlala phakathi kwesilotha.

⁹Umkakhe wasesithi kuye: Usabambelele yini kubuqotho bakho? Thuka uNkulunkulu, ufe.

¹⁰Kodwa wathi kuye: Ukhuluma njengokukhuluma komunye wabesifazana abayizithutha. Kambe, sizakwemukela okuhle kuNkulunkulu, singemukeli lokubi yini? Kukho konke lokhu uJobe konanga ngendebe zakhe.

¹¹Abangane abathathu bakaJobe sebezwile ngakho konke lokhu okubi okumehleleyo, beza, lowo lalowo evela endaweni yakhe, uElifazi umThemani, loBilidadi umShuhi, loZofari umNahama; bavumelana ndawonye ukuthi beze bamkhalele bamduduze.

¹²Lapho bephakamisa amehlo abo bekhatshana, kabamazanga, baphakamisa ilizwi labo, bakhala inyembezi, badabula ngulowo ibhatshi lakhe, bavuvuzela uthuli emakhanda abo ngasemazulwini.

¹³Basebehlala laye emhlabathini insuku eziyisikhombisa lobusuku obuyisikhombisa, njalo kakho owakhuluma ilizwi kuye, ngoba babona ukuthi ubuhlungu bukhulu kakhulu.