Read Ndebele-IBhayibhili Elingcwele 2006 Ujobho 20 Bible Online

Ujobho 20 - Ndebele-IBhayibhili Elingcwele 2006 bible

Ujobho 20

¹Wasephendula uZofari umNahama wathi:

²Ngakho imicabango yami ingenza ngiphendule, langenxa yokuphangisa kwami phakathi kwami.

³Ngizwile isijeziso sehlazo lami, lomoya wokuqedisisa kwami ungenza ngiphendule.

⁴Uyakwazi lokhu yini, kusukela endulo, selokhu kwabekwa umuntu emhlabeni,

⁵ukuthi injabulo yababi imfitshane, lentokozo yomzenzisi ngeyesikhatshana nje?

⁶Loba ubukhosi bakhe busenyukela emazulwini, lekhanda lakhe lifinyelela emayezini,

⁷uzabhubha phakade njengobulongwe bakhe; labo abambonileyo bathi: Ungaphi?

⁸Uzaphapha njengephupho, bangabe besamthola; yebo, uzaxotshwa njengombono webusuku.

⁹Ilihlo elike lambona aliyikuphinda, lendawo yakhe kayisayikumbona.

¹⁰Abantwana bakhe bazadinga ukuthokozisa abayanga, lezandla zakhe zibuyisele inotho yakhe.

¹¹Amathambo akhe ayegcwele ubutsha bakhe, kodwa azalala kanye laye enhlabathini.

¹²Uba ububi bumnandi emlonyeni wakhe, ebufihla ngaphansi kolimi lwakhe,

¹³ebugodla, engabuyekeli, kodwa ebugcina phakathi komlomo wakhe,

¹⁴ukudla kwakhe kuzaphenduka esiswini sakhe, kuzakuba yibuhlungu bezinyoka phakathi kwakhe.

¹⁵Uginye inotho, kodwa uzayihlanza; uNkulunkulu uzayikhupha esiswini sakhe.

¹⁶Uzamunya ubuhlungu bezinyoka, lolimi lwebululu luzambulala.

¹⁷Kayikubona izifula, imifula, izifudlana zoluju lolaza.

¹⁸Uzabuyisela lokho akusebenzelayo, angakuginyi; njengokwenotho izakuba njalo inhlawulo, njalo kayikuthokoza.

¹⁹Ngoba ubacindezele wabadela abayanga, waphanga indlu abengayakhanga.

²⁰Ngoba kakwazi ukuthula esiswini sakhe, kayikusindisa lutho kusifiso sakhe.

²¹Kakuyikusala lutho ekudleni kwakhe; ngenxa yalokhu okuhle kwakhe kakuyikuma.

²²Ekugcwaleni kokwanela kwakhe uzakuba lencindezelo; sonke isandla sohluphekayo sizamfikela.

²³Kuzakuthi lapho egcwalisa isisu sakhe, uNkulunkulu athumele kuye ukuvutha kwentukuthelo yakhe, akunise phezu kwakhe ekudleni kwakhe.

²⁴Uzabalekela isikhali sensimbi, idandili lethusi lizamhlaba.

²⁵Uyalihwatsha, liphume emhlana, lokubenyezelayo kuzaphuma enyongweni yakhe; izesabiso ziphezu kwakhe.

²⁶Ubumnyama bonke bufihlelwe izinto zakhe ezibekelelweyo; umlilo ongavuthelwayo uzamqeda; kuzakuba kubi kunsali ethenteni lakhe.

²⁷Amazulu azakwembula ububi bakhe, lomhlaba umvukele.

²⁸Ukwanda kwendlu yakhe kuzanyamalala, kukhukhulwe esukwini lwentukuthelo yakhe.

²⁹Lesi yisabelo somuntu omubi esivela kuNkulunkulu, lelifa alimiselwa nguNkulunkulu.