Read Ndebele-IBhayibhili Elingcwele 2006 Ujobho 21 Bible Online

Ujobho 21 - Ndebele-IBhayibhili Elingcwele 2006 bible

Ujobho 21

¹Wasephendula uJobe wathi:

²Zwanini lilalele ilizwi lami, lalokho kube zinduduzo zenu.

³Ngibekezelelani, ukuthi mina ngikhulume; lemva kokukhuluma kwami lingakloloda.

⁴Mina-ke ukusola kwami kusemuntwini yini? Kodwa uba kunjalo, kungani umoya wami ungekhathazeke?

⁵Ngikhangelani, likhakhamale, libeke isandla phezu komlomo.

⁶Yebo, lapho ngikhumbula, ngitshaywa luvalo, lokuthuthumela kubamba inyama yami.

⁷Ababi baphilelani, babe badala, yebo, bakhule emandleni?

⁸Inzalo yabo izinze phambi kwabo kanye labo, lezizukulu emehlweni abo.

⁹Izindlu zabo zilokuthula kungelakwesaba, loswazi lukaNkulunkulu kaluphezu kwabo.

¹⁰Inkunzi yakhe iyakhwela ingaphuthi; inkomokazi yakhe iyazala, ingaphunzi.

¹¹Bakhupha abantwanyana babo njengomhlambi, labantwana babo bayagida.

¹²Baphakamisa ilizwi ngesigujana lechacho, bathokoze ngelizwi lomhlanga.

¹³Bachitha insuku zabo ngokuhle, behlele engcwabeni ngokucwayiza kwelihlo.

¹⁴Babesebesithi kuNkulunkulu: Suka kithi; ngoba kasifisi ulwazi lwendlela zakho.

¹⁵Uyini uSomandla ukuthi simkhonze? Sizazuzani uba sikhuleka kuye?

¹⁶Khangela, okuhle kwabo kakukho esandleni sabo; icebo lababi likhatshana lami.

¹⁷Kukangaki isibane sababi sicitshwa, kusiza ukuchitheka kwabo phezu kwabo! UNkulunkulu ubabela ubuhlungu elakeni lwakhe.

¹⁸Banjengamahlanga phambi komoya, lanjengomule isiphepho esiwebayo.

¹⁹UNkulunkulu ubekela abantwana bakhe usizi lwakhe. Uyamvuza, njalo uzakwazi.

²⁰Amehlo akhe azabona ukuchitheka kwakhe, anathe okolaka lukaSomandla.

²¹Ngoba iyini intokozo yakhe endlini yakhe emva kwakhe, lapho inani lenyanga zakhe liqunywa?

²²Kukhona ongafundisa uNkulunkulu ulwazi yini? Ngoba yena wehlulela abaphezulu.

²³Lo uyafa esemandleni akhe apheleleyo, yena wonke onwabile, elokuthula.

²⁴Iziphathelo zakhe zigcwele uchago, lomnkantsho wamathambo akhe umanzi.

²⁵Lomunye ufa elomphefumulo obabayo, engadlanga kokuhle.

²⁶Balala ndawonye ethulini, lempethu zibasibekele.

²⁷Khangelani, ngiyayazi imicabango yenu, lamacebo e liwaceba limelene lami.

²⁸Ngoba lithi: Ingaphi indlu yesiphathamandla? Njalo lingaphi ithente lendawo zababi zokuhlala?

²⁹Kalibabuzanga yini abadlula ngendlela, njalo kalinanzeleli iziboniso zabo?

³⁰Ukuthi omubi uyekelelwa usuku lokubhujiswa; bazalethwa osukwini lwezintukuthelo.

³¹Ngubani ozamtshela indlela yakhe ebusweni? Ngubani ozamphindisela ngakwenzileyo?

³²Kanti yena uzasiwa engcwabeni, alinde elibeni.

³³Amagade esihotsha amnandi kuye, njalo udonsa wonke umuntu emva kwakhe, njengoba bengelakubalwa abaphambi kwakhe.

³⁴Pho lizangiduduza njani ngeze, ngoba empendulweni zenu kusele inkohliso?