Read Ndebele-IBhayibhili Elingcwele 2006 Ujobho 22 Bible Online

Ujobho 22 - Ndebele-IBhayibhili Elingcwele 2006 bible

Ujobho 22

¹Wasephendula uElifazi umThemani wathi:

²Umuntu angaba losizo kuNkulunkulu yini, ngoba ohlakaniphileyo elusizo kuye ngokwakhe?

³Kuyintokozo yini kuSomandla ukuthi ulungile? Kumbe inzuzo kuye ukuthi uphelelise indlela zakho?

⁴Uzakusola yini ngenxa yokwesaba kwakho? Uzangena lawe kusahlulelo.

⁵Ububi bakho kabubukhulu yini, lezono zakho kazilakuphela?

⁶Ngoba uthethe isibambiso kubafowenu kungelasizatho, wahlubula abanqunu izigqoko.

⁷Kawumnathisanga amanzi odiniweyo, lolambileyo umgodlele ukudla.

⁸Kodwa umuntu olengalo, umhlaba ungowakhe, lowemukeleka ebusweni wahlala kuwo.

⁹Uxotshile abafelokazi bengelalutho, lengalo zezintandane zichotshoziwe.

¹⁰Ngakho-ke imijibila ikuhanqile, lovalo luhle lwakwesabisa,

¹¹kumbe ubumnyama ukuze ungaboni, lesikhukhula samanzi sikusibekele.

¹²UNkulunkulu kakho yini engqongeni yamazulu? Bona-ke ingqonga yezinkanyezi, ukuthi ziphakeme.

¹³Kanti uthi: UNkulunkulu wazini? Angahlulela yini engemuva komnyama onzima?

¹⁴Amayezi amnyama ayisisibekelo sakhe ukuze angaboni, uhamba esigombolozini samazulu.

¹⁵Usunanzelele indlela endala yini abantu ababi abanyathela kuyo?

¹⁶Abahluthunwa kunga ka bi yisikhathi; uzamcolo wathululwa phezu kwesisekelo sabo.

¹⁷Abathi kuNkulunkulu: Suka kithi. LoSomandla wayenzeni kubo?

¹⁸Kanti yena wayegcwalise izindlu zabo ngokuhle; kodwa icebo labakhohlakeleyo likhatshana lami.

¹⁹Abalungileyo bayakubona bathokoze, lomsulwa ubahleka usulu.

²⁰Isibili isitha sethu sichithiwe, lomlilo uqede insali yabo.

²¹Ake wejwayelane laye, ube lokuthula, ngalokho okuhle kuzakuza kuwe.

²²Ake wemukele umlayo ovela emlonyeni wakhe, ubeke amazwi akhe enhliziyweni yakho.

²³Uba ubuyela kuSomandla, uzakwakhiwa, ususe okubi khatshana lamathente akho.

²⁴Ubusubeka igolide lakho othulini, le golide leOfiri elitsheni lezifula.

²⁵Ngakho uSomandla uzakuba ligolide lakho, lesiliva sakho esikhethiweyo.

²⁶Ngoba ngalesosikhathi uzazithokozisa ngoSomandla, uphakamisele ubuso bakho kuNkulunkulu.

²⁷Uzakhuleka kuye, akuzwe, ukhokhe izifungo zakho.

²⁸Uzaquma-ke udaba, luqiniseke kuwe, lokukhanya kukhanye endleleni zakho.

²⁹Nxa behliselwe phansi, ubususithi: Phezulu! Abesesindisa othobekileyo ngamehlo.

³⁰Uzamkhulula ongemsulwa; njalo ukhululwa ngokuhlanzeka kwezandla zakho.