Read Ndebele-IBhayibhili Elingcwele 2006 Ujobho 31 Bible Online

Ujobho 31 - Ndebele-IBhayibhili Elingcwele 2006 bible

Ujobho 31

¹Ngenza isivumelwano lamehlo ami; pho ngingananzelela njani intombi?

²Ngoba siyini isabelo sikaNkulunkulu esivela phezulu, lelifa likaSomandla elivela endaweni eziphezulu?

³Incithakalo kayisiyomubi yini, lengozi yabenzi bobubi?

⁴Yena kaziboni yini indlela zami, abale zonke izinyathelo zami?

⁵Uba ngihambe ngokuyize, kumbe unyawo lwami luphuthumele enkohlisweni,

⁶kangilinganise ngesilinganiso esilungileyo, ukuze uNkulunkulu azi ubuqotho bami.

⁷Uba inyathelo lami liphambukile endleleni, lenhliziyo yami yalandela amehlo ami, kumbe kunamathele isici ezandleni zami;

⁸kangihlanyele, kodwa kudle omunye, lezilimo zami zisitshulwe.

⁹Uba inhliziyo yami iyengwe ngowesifazana, kumbe ngacathama emnyango kamakhelwane wami,

¹⁰umkami kacholele omunye, labanye kabaguqe phezu kwakhe.

¹¹Ngoba lokho kuyinkohlakalo, njalo kuyisono nga bahluleli.

¹²Ngoba ngumlilo odla kuze kube yincithakalo, usiphule sonke isivuno sami.

¹³Uba ngalile udaba lwenceku yami loba olwencekukazi yami, lapho ziphikisana lami,

¹⁴pho ngizakwenzani lapho uNkulunkulu esukuma? Lalapho esethekela, ngizaphendulani kuye?

¹⁵Lowo owangenza esiswini kamenzanga yena yini, lowasibumba esiswini munye?

¹⁶Uba ngigodlele umyanga isifiso, kumbe ngifiphaze amehlo omfelokazi,

¹⁷kumbe ngadla ucezu lwami ngedwa, ukuze intandane ingadli kulo

¹⁸(ngoba kwasebutsheni bami yakhula lami ngi njengoyise, ngamqondisa kusukela esizalweni sikamama),

¹⁹uba ngabona obhubha ngenxa yokuswela isigqoko, loba umyanga engelasembatho,

²⁰uba inkalo zakhe zingangibusisanga, ngoba ekhudunyezwe yiboya bezimvu zami,

²¹uba ngaphakamisela isandla sami phezu kwentandane, lapho ngabona usizo lwami esangweni,

²²kaliwe ihlombe lami esiphangeni sami, lengalo yami iqamuke ethanjeni layo.

²³Ngoba incithakalo kaNkulunkulu yayiyisesabiso kimi, ngingenelisi ngenxa yobukhulu bakhe.

²⁴Uba ngenzile igolide laba lithemba lami, ngathi kugolide elihle: Themba lami.

²⁵Uba ngithokozile ngoba inotho yami inengi, langoba isandla sami sithole okunengi;

²⁶uba ngikhangele ukukhanya lapho kubenyezela, loba inyanga ehamba enkazimulweni,

²⁷lenhliziyo yami yayengwa ensitha, kumbe isandla sami sange umlomo wami,

²⁸lalokho yisiphambeko phambi kwabehluleli, ngoba ngabe ngimphikile uNkulunkulu waphezulu.

²⁹Uba ngithokozile ngokuchitheka kongizondayo, kumbe ngajabula lapho ububi bumthola;

³⁰njalo ngingavumelanga umlomo wami ukuthi wone, ngokucela umphefumulo wakhe ngesiqalekiso;

³¹uba abantu bethente lami bebengatshongo ukuthi: Hawu, aluba besilokwenyama yakhe, ngabe kasisuthanga.

³²Owemzini kazanga alale esitaladeni; iminyango yami ngayivulela isihambi.

³³Uba ngasibekela iziphambeko zami njengoAdamu, ngokufihla isono sami esifubeni sami.

³⁴Ngoba ngethuswa lixuku elikhulu, lokudelelwa ngabensendo kwangesabisa, ngakho ngathula, kangaze ngaphuma emnyango.

³⁵Kungathi ngabe ngilongangizwa! Khangelani, isifiso sami yikuthi ngabe uSomandla uyangiphendula, lokuthi ophikisana lami ngabe ubhale ugwalo!

³⁶Isibili, bengingaluthwala ehlombe lami, ngilubophe lube ngumqhele kimi.

³⁷Ngimtshele inani lezinyathelo zami, ngisondele kuye njengesiphathamandla.

³⁸Uba umhlaba wami ukhalile ngami, lemifolo yawo ililile ndawonye,

³⁹uba ngidlile amandla awo kungelamali, kumbe ngenza umphefumulo wabaniniwo uphele,

⁴⁰kakuhlume ukhula oluhlabayo endaweni yengqoloyi, lokhula olunukayo endaweni yebhali. Amazwi kaJobe a se phelile.