Read Ndebele-IBhayibhili Elingcwele 2006 Ujobho 32 Bible Online

Ujobho 32 - Ndebele-IBhayibhili Elingcwele 2006 bible

Ujobho 32

¹Lawomadoda amathathu aseyekela ukumphendula uJobe, ngoba wayelungile emehlweni akhe.

²Lwaseluvutha ulaka lukaElihu indodana kaBarakeli umBuzi, owosendo lukaRamu. Ulaka lwakhe lwavuthela uJobe ngoba wazilungisisa yena kuloNkulunkulu.

³Ulaka lwakhe lwabavuthela labo abangane bakhe abathathu, ngoba bengatholanga impendulo, kube kanti bamlahla uJobe.

⁴Kodwa UElihu wayelindele uJobe ekhuluma, ngoba babebadala ngensuku kulaye.

⁵UElihu esebonile ukuthi kwakungelampendulo emlonyeni walamadoda amathathu, ulaka lwakhe lwaseluvutha.

⁶Ngakho uElihu indodana kaBarakeli umBuzi waphendula wathi: Mina ngingomncinyane ngezinsuku, lina-ke libadala. Ngenxa yalokhu bengithikaza, ngesaba ukulitshela umcabango wami.

⁷Ngathi: Kakukhulume izinsuku, lobunengi beminyaka bazise inhlakanipho.

⁸Isibili umoya ukhona emuntwini, lokuphefumulela kukaSomandla kuyabanika ukuqedisisa.

⁹Abakhulu kabahlakaniphanga, labalupheleyo ka baqedisis i isahlulelo.

¹⁰Ngakho ngithi: Lalelani kimi; lami ngizatshengisa umcabango wami.

¹¹Khangelani, bengiwalindele amazwi enu, ngabeka indlebe ekukhulumeni kwenu okuhlakaniphileyo, lisadinga amazwi.

¹²Yebo, ngalilalela, khangelani-ke, kakho phakathi kwenu omvumisileyo uJobe, owaphenduleyo amazwi akhe.

¹³Hlezi lithi: Sitholile inhlakanipho; nguNkulunkulu ozamxotsha, hatshi umuntu.

¹⁴Kodwa kangihlelelanga amazwi, langamazwi enu kangiyikumphendula.

¹⁵Badideka, kabasaphendulanga, basusa amazwi kubo.

¹⁶Ngasengilinda, kodwa kabakhulumanga, ngoba bema, kabasaphendulanga.

¹⁷Lami ngizaphendula ingxenye yami, lami ngitshengise umcabango wami.

¹⁸Ngoba ngigcwele amazwi, umoya wesisu sami uyangiqhubezela.

¹⁹Khangelani, isisu sami sinjengewayini engavulwanga, njengemigodla emitsha sizadabuka.

²⁰Ngizakhuluma ukuze ngiphefumule; ngivule indebe zami, ngiphendule.

²¹Ake ngingaphakamisi ubuso bomuntu, ngingabizi umuntu ngebizo lokubamba amehlo.

²²Ngoba kangikwazi ukunika amabizo okubamba amehlo; masinyane umenzi wami angangisusa.