Read Ndebele-IBhayibhili Elingcwele 2006 Ujobho 37 Bible Online

Ujobho 37 - Ndebele-IBhayibhili Elingcwele 2006 bible

Ujobho 37

¹Langenxa yalokho inhliziyo yami iyathuthumela, yeqe endaweni yayo.

²Zwana lokuzwa umdumo welizwi lakhe, lomsindo o phuma emlonyeni wakhe.

³Uyakukhulula ngaphansi kwamazulu wonke, lokukhanya kwakhe kuze kube semikhawulweni yomhlaba.

⁴Emva kwalokho kubhonga ilizwi, uyaduma ngelizwi lokuphakama kwakhe, angakunqandi lapho kuzwakala ilizwi lakhe.

⁵UNkulunkulu uyaduma ngelizwi lakhe ngokumangalisayo kakhulu, wenza izinto ezinkulu, esingeziqedisise.

⁶Ngoba kuliqhwa elikhithikayo uthi: Woba semhlabeni; la ku zihlambo zezulu, la ku zihlambo zezulu elikhulu lamandla akhe.

⁷Uyanamathelisa isandla somuntu wonke, ukuze bazi bonke abantu bomsebenzi wakhe.

⁸Inyamazana ziyangena emihomeni yazo, zihlale ezikhundleni zazo.

⁹Isivunguzane siphuma ekamelweni, lomqando emoyeni wenyakatho.

¹⁰Ngomoya kaNkulunkulu kunikwa ungqwaqwane, lamanzi abanzi abe yilitshe.

¹¹Njalo uthwalisa amayezi ngobumanzi, ahlakaze iyezi lokukhanya kwakhe.

¹²Njalo lona liyajikajika liphenduka ngokuqondisa kwakhe, ukuze enze konke awalaye khona, ebusweni bomhlaba emhlabathini.

¹³Loba ngoswazi, loba ngomhlaba wakhe, loba ngomusa, uyakufikisa.

¹⁴Beka indlebe kukho, Jobe; mana, unanzelele imisebenzi emangalisayo kaNkulunkulu.

¹⁵Uyazi yini ukuthi uNkulunkulu uwalungisa nini, enze ukukhanya kwamayezi akhe kukhanye?

¹⁶Uyazi yini ukulengiswa kwamayezi, izimangaliso zopheleleyo elwazini lonke?

¹⁷Ukuthi izigqoko zakho zikhudumala njani, ekuthuliseni umhlaba ngo moya weningizimu?

¹⁸Uwendlalile yini amayezi kanye laye, aqine njengesibuko esibunjiweyo ngokuncibilikisa?

¹⁹Sifundise ukuthi sizakuthini kuye; singeke silungise lutho ngenxa yomnyama.

²⁰Kungalandiswa kuye yini ukuthi ngiyakhuluma? Uba umuntu engakhuluma, isibili uzaginywa.

²¹Khathesi-ke kabakuboni ukukhanya okubenyezelayo okusemayezini, lapho umoya udlula uwahlambulula.

²²Igolide livela enyakatho. KuNkulunkulu kulobukhosi obesabekayo.

²³USomandla singemfumane; uphakeme ngamandla, langokwahlulela, njalo mkhulu ngokulunga; kacindezeli.

²⁴Ngakho abantu bayamesaba; kanaki wonke owabahlakaniphileyo ngenhliziyo.