Read Ndebele-IBhayibhili Elingcwele 2006 Ujobho 38 Bible Online

Ujobho 38 - Ndebele-IBhayibhili Elingcwele 2006 bible

Ujobho 38

¹I Nkosi yasimphendula uJobe isesivunguzaneni yathi:

²Ngubani lo ofiphaza iseluleko ngamazwi angelalwazi?

³Bopha-ke ukhalo lwakho njengendoda, njalo ngizakubuza, njalo ungenze ngazi.

⁴Wawungaphi lapho ngimisa izisekelo zomhlaba? Tshono uba usazi ukuqedisisa.

⁵Ngubani owabeka izilinganiso zawo, uba ukwazi? Kumbe ngubani owelulela intambo yokulinganisa phezu kwawo?

⁶Izisekelo zawo zamiswa phezu kwani? Kumbe ngubani owabeka ilitshe lawo lengonsi,

⁷lapho inkanyezi zokusa zahlabela kanyekanye, lamadodana wonke kaNkulunkulu amemeza ngenjabulo?

⁸Kumbe ngubani owavalela ulwandle ngezivalo, lapho lufohla luphuma esiswini,

⁹lapho ngimisa iyezi laba yisembatho salo, lomnyama onzima waba yimbeleko yalo?

¹⁰Njalo ngaluqumela isimiso, ngamisa imigoqo lezivalo,

¹¹ngathi: Uzafika kuze kube lapha, kodwa ungedluli, lalapha kuzamelana lokuzigqaja kwamagagasi akho.

¹²Kusukela ensukwini zakho walawula ukusa yini, wenza ukudabuka kokusa ukuthi kwazi indawo yakho,

¹³ukuthi kubambe imiphetho yomhlaba, ukuze kuthintithe ababi kuwo?

¹⁴Kuyaguquka njengebumba lophawu lokunamathisela, kuzimisa njengesembatho.

¹⁵Lakwababi ukukhanya kwabo kuyagodlwa, lengalo ephakemeyo iyephulwa.

¹⁶Usungenile emithonjeni yolwandle yini, wahamba usiya le lale ekudingeni inziki?

¹⁷Amasango okufa wawembulelwa yini, wawabona amasango ethunzi lokufa?

¹⁸Uqedisisile yini kuze kube sebubanzini bomhlaba? Tshono uba ukwazi konke.

¹⁹Ingaphi indlela lapho okuhlala khona ukukhanya? Lomnyama, ingaphi indawo yawo,

²⁰ukuze ukuse emngceleni wakho, lokuthi uqedisise izindlela zomuzi wakho?

²¹Uyazi, ngoba wawusuzelwe, lenani lensuku zakho likhulu.

²²Usungenile eziphaleni zeliqhwa elikhithikayo yini, wabona iziphala zesiqhotho,

²³engizigodle kuze kube yisikhathi sokuhlupheka, kuze kube lusuku lokulwa lolwempi?

²⁴Ingaphi indlela lapho ukukhanya okwabiwa khona, umoya wempumalanga ohlakazeka khona emhlabeni?

²⁵Ngubani owehlukanisela impophoma indlela yamanzi, lendlela yombane wemidumo,

²⁶ukuthi line emhlabeni lapho okungelamuntu khona, enkangala okungelamuntu kuyo,

²⁷ukusuthisa inkangala legwadule, lokuhlumisa ukuphuma kotshani?

²⁸Izulu liloyise yini, kumbe ngubani owazala amathonsi amazolo?

²⁹Ungqwaqwane waphuma esiswini sikabani? Njalo ngubani owazala iliqhwa lamazulu?

³⁰Amanzi afihlakele njengelitshe, lobuso bokujula bujiyile.

³¹Ungazibopha yini izibopho zesiLimela, kumbe uthukulule intambo zeziNja?

³²Ungakhupha yini izinkanyezi ngesikhathi sazo? Ungakhokhela yini iBhere kanye labantwana balo?

³³Uyazazi yini izimiso zamazulu, kumbe ungamisa umbuso wazo emhlabeni?

³⁴Ungaphakamisela yini ilizwi lakho emayezini, ukuthi ubunengi bamanzi bukusibekele?

³⁵Ungathuma yini imibane ukuthi ihambe, ithi kuwe: Khangela, si lapha?

³⁶Ngubani owabeka inhlakanipho emibilini? Kumbe ngubani onike ukuqedisisa engqondweni?

³⁷Ngubani ongabala amayezi ngenhlakanipho? Njalo ngubani ongalalisa imbodlela zamazulu,

³⁸lapho uthuli luqina lube yizigaqa, lamagade anamathelane?

³⁹Ungasizingelela yini isilwane ukudla, kumbe usuthise ukulamba kwamabhongo esilwane,

⁴⁰lapho zicathame emihomeni, zihlala esikhundleni ukuthi zicathame?

⁴¹Ngubani olungisela iwabayi ukudla kwalo, lapho amatsiyane alo ekhala kuNkulunkulu, ezulazula ngoba kungelakudla?