Read Ndebele-IBhayibhili Elingcwele 2006 Ujobho 42 Bible Online

Ujobho 42 - Ndebele-IBhayibhili Elingcwele 2006 bible

Ujobho 42

¹UJobe waseyiphendula i Nkosi wathi:

²Ngiyazi ukuthi ungakwenza konke, lokuthi kakulacebo elingavinjelwa kuwe.

³Ngubani lo ofiphaza iseluleko engelalwazi? Ngakho ngikhulumile lokho ebengingakuqedisisi, izinto ezimangalisayo kakhulu kimi, ebengingazazi.

⁴Ake uzwe, ngizakhuluma mina. Ngizakubuza, njalo wenze ngazi.

⁵Ngokuzwa kwendlebe ngikuzwile, kodwa khathesi ilihlo lami liyakubona.

⁶Ngakho-ke ngiya zi nenga, ngiyaphenduka ethulini lemlotheni.

⁷Kwasekusithi i Nkosi isikhulume lamazwi kuJobe, i Nkosi yathi kuElifazi umThemani: Ulaka lwami luyavutha kuwe lakubangane bakho ababili, ngoba kalikhulumanga ngami okuqondileyo njengenceku yami uJobe.

⁸Ngakho-ke zithatheleni amajongosi ayisikhombisa lenqama eziyisikhombisa, liye encekwini yami uJobe, lizinikelele umnikelo wokutshiswa, njalo uJobe inceku yami uzalikhulekela; ngoba isibili ngizakwemukela ubuso bakhe, ukuze ngingenzi kini njengo buthutha benu; ngoba kalikhulumanga ngami okuqondileyo njengenceku yami uJobe.

⁹Ngakho bahamba oElifazi umThemani loBilidadi umShuhi lo Zofari umNahama, benza njengokutsho kwe Nkosi kubo; njalo i Nkosi yemukela ubuso bukaJobe.

¹⁰I Nkosi yasiphendula ukuthunjwa kukaJobe esekhulekele abangane bakhe; njalo i Nkosi yengezelela konke uJobe ayelakho kuze kuphindwe kabili.

¹¹Kwasekufika kuye bonke abafowabo labo bonke odadewabo, labo bonke ababemazi mandulo, badla isinkwa laye endlini yakhe, bamkhalela, bamduduza ngakho konke okubi i Nkosi eyayimehlisele khona; bamnika ngulowo lalowo uhlamvu lwemali, lalowo lalowo isongo legolide.

¹²I Nkosi yasibusisa isiphetho sikaJobe okwedlula ukuqala kwakhe; ngoba waba lezimvu ezizinkulungwane ezilitshumi lane, lamakamela azinkulungwane eziyisithupha, lezipane zenkabi eziyinkulungwane, labobabhemi abasikazi abayinkulungwane.

¹³Wasesiba lamadodana ayisikhombisa lamadodakazi amathathu.

¹⁴Wasebiza ibizo leyokuqala wathi nguJemima, lebizo leyesibili wathi nguKeziya, lebizo leyesithathu wathi nguKereni-Hapuki.

¹⁵Njalo kakutholakalanga abesifazana abahle njengamadodakazi kaJobe elizweni lonke; loyise wawanika ilifa phakathi kwabanewabo.

¹⁶Lemva kwalokho uJobe waphila iminyaka elikhulu lamatshumi amane; wabona abantwana bakhe, labantwana babantwana bakhe, kwaze kwaba yizizukulwana ezine.

¹⁷UJobe wasesifa, emdala, enele ngezinsuku.