Read Ndebele-IBhayibhili Elingcwele 2006 Ujobho 7 Bible Online

Ujobho 7 - Ndebele-IBhayibhili Elingcwele 2006 bible

Ujobho 7

¹Kakukho yini imfazo kumuntu emhlabeni, lensuku zakhe ka zinjengensuku zoqatshiweyo yini?

²Njengesigqili sikhefuzelela umthunzi, lanjengesiqatshwa silindele iholo laso,

³ngokunjalo mina ngidliswe ilifa lenyanga zeze, lobusuku bezinhlupheko bubalelwe mina.

⁴Lapho ngilala phansi ngithi: Ngizavuka nini? Ngoba ubusuku bude, njalo ngigcwele ukutshukuma kuze kuse.

⁵Inyama yami yembethe impethu lamagade othuli; isikhumba sami siyadabuka siyenyanyeka.

⁶Insuku zami ziyaphangisa kuleselukiso someluki, ziphele kungelathemba.

⁷Khumbula ukuthi impilo yami ingumoya; ilihlo lami kaliyikuphinda libone okuhle.

⁸Ilihlo longibonayo kaliyikungibona futhi; amehlo akho aphezu kwami, kodwa ngizakuba nginga se kho.

⁹Iyezi liyaphela linyamalale; ngokunjalo owehlela engcwabeni kayikwenyuka.

¹⁰Kaphindi abuyele emzini wakhe, lendawo yakhe kayisayikumazi.

¹¹Ngakho mina kangiyikubamba umlomo wami; ngizakhuluma ekucindezelweni komoya wami, ngisole ekubabeni komphefumulo wami.

¹²Ngilulwandle yini, kumbe isilo solwandle, ukuze lingibekele abalindi?

¹³Lapho ngisithi: Umbheda wami uzangiduduza, icansi lami liphungule ukusola kwami;

¹⁴ubusungiqhaqhazelisa ngamaphupho, angethuse ngemibono;

¹⁵ukuze umphefumulo wami ukhethe ukuklinywa, ukufa kulamathambo ami.

¹⁶Ngiyanengwa yikho, kangiyikuphila njalonjalo; ngiyekele, ngoba insuku zami ziyize.

¹⁷Uyini umuntu ukuthi umkhulise, lokuthi ubeke inhliziyo yakho kuye,

¹⁸lokuthi umhambele ikuseni yonke, umlinge sonke isikhathi?

¹⁹Koze kube nini ungayekeli ukungiqaphela, ungangiyekeli ngize ngiginye amathe ami yini?

²⁰Ngonile, ngizakwenzani kuwe, wena mlindi wabantu? Ungimiseleni ngibe yinto yakho yokunenjwa, ngize ngibe ngumthwalo kimi?

²¹Njalo kawuthetheleli ngani isiphambeko sami, ususe isono sami? Ngoba sengizalala phansi othulini; uzangidinga ngovivi, kodwa kangiyikuba khona.