Read Ndebele-IBhayibhili Elingcwele 2006 Ujobho 8 Bible Online

Ujobho 8 - Ndebele-IBhayibhili Elingcwele 2006 bible

Ujobho 8

¹Wasephendula uBilidadi umShuhi wathi:

²Koze kube nini ukhuluma lezizinto, lamazwi omlomo wakho abe ngumoya olamandla?

³UNkulunkulu uyahlanekela isahlulelo yini? Kumbe uSomandla uyahlanekela ukulunga yini?

⁴Uba abantwana bakho bonile kuye, yena usebalahlile emandleni esiphambeko sabo;

⁵uba wena umdinga uNkulunkulu ngovivi, uncenge kuSomandla;

⁶uba uhlambulukile, uqotho; isibili khathesi ubezavuka ngenxa yakho, aphumelelise indawo yokuhlala yokulunga kwakho.

⁷Lanxa ukuqala kwakho bekukuncinyane, kube kanti isiphetho sakho sizakwanda kakhulu.

⁸Ngoba ake ubuze esizukulwaneni sakuqala, uzilungisele isidingo saboyise.

⁹Ngoba singabezolo, njalo kasazi, ngoba insuku zethu emhlabeni ziyisithunzi.

¹⁰Kabayikukufundisa yini, bakutshele, bakhuphe amazwi enhliziyweni yabo?

¹¹Imihlanga ingakhula lapho okungelaxhaphozi khona yini? Ibhuma likhule lapho okungelamanzi khona?

¹²Nxa lisebuluhlazeni balo linga ka khiwa, kube kanti libuna kuqala kwazo zonke izihlahlakazana.

¹³Zinjalo indlela zabo bonke abamkhohlwayo uNkulunkulu, lethemba lomzenzisi lizabhubha.

¹⁴Othemba lakhe lizaqunywa, lokuthemba kwakhe kuyibulembu besayobe.

¹⁵Uyeyama endlini yakhe, kodwa kayimi; ubambelela kiyo, kodwa kayihlali.

¹⁶Uluhlaza phambi kwelanga, lamahlumela akhe aphuma esivandeni sakhe.

¹⁷Impande zakhe zithandele enqumbini; ubona indawo yamatshe.

¹⁸Uba emchitha endaweni yakhe, izamphika ithi: Kangizange ngikubone.

¹⁹Khangela, le yintokozo yendlela yakhe; njalo kuzakhula abanye emhlabathini.

²⁰Khangela, uNkulunkulu kayikumlahla opheleleyo, kabambi isandla sabenzi bobubi.

²¹Aze agcwalise umlomo wakho ngohleko, lezindebe zakho ngokumemeza kwentokozo.

²²Abakuzondayo bazakwembeswa ngenhloni, lethente lababi lingabi khona.