Read Ndebele-IBhayibhili Elingcwele 2006 Amarhubo 10 Bible Online

Amarhubo 10 - Ndebele-IBhayibhili Elingcwele 2006 bible

Amarhubo 10

¹Nkosi, umeleni khatshana? Ucatshela ni ezikhathini zokuhlupheka?

²Omubi ekuzigqajeni uyamzingelisisa umyanga; kababanjwe ngamagobe abawacebileyo.

³Ngoba omubi uyazikhukhumeza ngesifiso somphefumulo wakhe, uyasibusisa isihwaba, ayeyise i Nkosi.

⁴Omubi, ngokuzigqaja kobuso bakhe, kadingi uNkulunkulu; emicabangweni yakhe yonke kakho uNkulunkulu.

⁵Indlela zakhe ziqinile isikhathi sonke; izahlulelo zakho ziphakeme zikhatshana laye; izitha zakhe zonke uyazivuthela.

⁶Uthi enhliziyweni yakhe: Kangiyikunyikinywa; ngoba esizukulwaneni lesizukulwana ka ngi yikuba sebunzimeni.

⁷Umlomo wakhe ugcwele ukuthuka lezinkohliso lobuqili; ngaphansi kolimi lwakhe kukhona ukona lobubi.

⁸Uhlezi endaweni yokucathama yemizi, ezindaweni ezisithekileyo ubulala ongelacala; amehlo akhe akhangele othithibeleyo ngasese.

⁹Uyacatsha ekusithekeni njengesilwane ebhalwini lwaso; ucatshela ukumbamba ongumyanga, uyabamba ongumyanga ngokumhudulela embuleni lakhe.

¹⁰Uyaqutha, uyakhothama, ukuthi umyanga awe ngokulamandla kwakhe.

¹¹Uthi enhliziyweni yakhe: UNkulunkulu ukhohliwe, ufihle ubuso bakhe, kasoze abone lanini.

¹²Sukuma, Nkosi ! Nkulunkulu, phakamisa isandla sakho, ungabakhohlwa abahluphekayo.

¹³Kungani omubi edelela uNkulunkulu? Uthi enhliziyweni yakhe: Kawuyikukubiza.

¹⁴Uyabona, ngoba wena uyakhangela ububi lenhlupheko, ukukubeka esandleni sakho. Umyanga uyazinikela kuwe; wena ungumsizi wezintandane.

¹⁵Yephula ingalo yokhohlakeleyo lomubi; dinga inkohlakalo yakhe ukuze ungabe u sa yithola.

¹⁶UJehova yiNkosi kuze kube nini lanini; izizwe zibhubhile elizweni layo.

¹⁷Nkosi, uzwile isifiso sabathobekileyo, uzaqinisa inhliziyo yabo, wenze indlebe yakho izwe,

¹⁸ukwahlulela intandane locindezelweyo, ukuze umuntu wasemhlabeni angabe esesabeka.