Read Ndebele-IBhayibhili Elingcwele 2006 Amarhubo 102 Bible Online

Amarhubo 102 - Ndebele-IBhayibhili Elingcwele 2006 bible

Amarhubo 102

¹Nkosi, zwana umkhuleko wami, lokukhala kwami kakuze kuwe.

²Ungangifihleli ubuso bakho esukwini lohlupho lwami; beka indlebe yakho kimi; mhla ngibiza ungiphendule masinyane.

³Ngoba insuku zami ziyanyamalala njengentuthu, lamathambo ami ayatsha njengeziko.

⁴Inhliziyo yami itshayiwe, yabuna njengotshani, ngaze ngakhohlwa ukudla isinkwa sami.

⁵Ngenxa yelizwi lokububula kwami amathambo ami anamathela esikhumbeni sami.

⁶Ngifanana lewunkwe yenkangala, senginjengesikhova sezindawo ezidilikileyo.

⁷Ngiyalinda, senginjengenyoni ehlezi yodwa ephahleni.

⁸Izitha zami ziyangithuka usuku lonke; abangihlanyelayo bafunga ngami.

⁹Ngoba ngidle umlotha njengesinkwa, ngixubanise okunathwayo kwami lezinyembezi,

¹⁰ngenxa yentukuthelo yakho lolaka lwakho; ngoba ungiphakamisile, wasungilahla phansi.

¹¹Insuku zami zinjengesithunzi eselulekayo, njalo mina ngiyabuna njengotshani.

¹²Kodwa wena, Nkosi, uzahlala kuze kube nininini, lesikhumbuzo sakho kusizukulwana lesizukulwana.

¹³Wena uzavuka uhawukele iZiyoni; ngoba isikhathi sokuyitshengisa umusa, yebo, isikhathi esimisiweyo sesifikile.

¹⁴Ngoba inceku zakho ziyawathanda amatshe ayo, zilesihawu ethulini lwayo.

¹⁵Khona izizwe zizalesaba ibizo le Nkosi, lamakhosi wonke omhlaba udumo lwayo.

¹⁶Lapho i Nkosi izayakha iZiyoni, izabonakala enkazimulweni yayo.

¹⁷Izaphendukela emkhulekweni wongelalutho, kayiyikudelela umthandazo wabo.

¹⁸Lokhu kuzabhalelwa isizukulwana esilandelayo, labantu abazadalwa bazadumisa i Nkosi.

¹⁹Ngoba yakhangela phansi isekuphakameni kwendawo yayo engcwele; i Nkosi isemazulwini yakhangela emhlabeni,

²⁰ukuzwa ukububula kwesibotshwa, ukukhulula abantwana bokufa;

²¹ukulandisa ibizo le Nkosi eZiyoni, lendumiso yayo eJerusalema,

²²lapho izizwe zibuthana ndawonye, lemibuso, ukuyikhonza i Nkosi.

²³Yathoba amandla ami endleleni, yafinyeza insuku zami.

²⁴Ngathi: Nkulunkulu wami, ungangisusi phakathi kwensuku zami, iminyaka yakho isesizukulwaneni l ezizukulwana.

²⁵Endulo wawusekela umhlaba, lamazulu angumsebenzi wezandla zakho.

²⁶Lokho kuzabhubha, kodwa wena uzakuma. Kuzaguga-ke konke njengesembatho, njengesigqoko uzakuguqula, njalo kuzaguqulwa.

²⁷Kodwa wena unguwe njalo, leminyaka yakho kayipheli.

²⁸Abantwana benceku zakho bazahlala, lenzalo yazo izaqiniswa phambi kwakho.