Read Ndebele-IBhayibhili Elingcwele 2006 Amarhubo 105 Bible Online

Amarhubo 105 - Ndebele-IBhayibhili Elingcwele 2006 bible

Amarhubo 105

¹Bongani i Nkosi, libize ibizo layo, lazise phakathi kwezizwe izenzo zayo.

²Hlabelelani kuyo, lihlabelele amahubo kuyo, likhulume ngezenzo zayo zonke ezimangalisayo.

³Zincomeni ebizweni layo elingcwele; kayithokoze inhliziyo yabadinga i Nkosi.

⁴Dingani i Nkosi lamandla ayo, lidinge ubuso bayo njalonjalo.

⁵Khumbulani izenzo zayo ezimangalisayo eyazenzayo, izimangaliso zayo lezahlulelo zomlomo wayo,

⁶nzalo kaAbrahama inceku yayo, bantwana bakaJakobe abakhethiweyo bayo.

⁷Yona iyi Nkosi uNkulunkulu wethu; izahlulelo zayo zisemhlabeni wonke.

⁸Iyakhumbula isivumelwano sayo kuze kube nininini, ilizwi eyalilaya kuzizukulwana eziyinkulungwane,

⁹eyasenza loAbrahama, lesifungo sayo kuIsaka;

¹⁰eyasiqinisa kuJakobe saba yisimiso, kuIsrayeli saba yisivumelwano esilaphakade,

¹¹isithi: Ngizakunika wena ilizwe leKhanani, isabelo selifa lakho.

¹²Besebalutshwana ngenani, yebo, bebalutshwana, labemzini kulo;

¹³basebezula besuka esizweni besiya esizweni, besuka ko munye umbuso besiya kwabanye abantu;

¹⁴kayivumelanga muntu ukubahlupha; yasikhuza amakhosi ngenxa yabo,

¹⁵isithi: Lingathinti abagcotshiweyo bami, lingoni abaprofethi bami.

¹⁶Yasibiza indlala phezu kwelizwe, yephula udondolo lonke lwesinkwa.

¹⁷Yathuma indoda phambi kwabo: UJosefa wathengiswa waba yisigqili.

¹⁸Bazwisa ubuhlungu inyawo zakhe ngamaketane, yena ngokwakhe wafika ensimbini.

¹⁹Kwaze kwaba yisikhathi sokufika kwelizwi lakhe, ilizwi likaJehova lamlinga.

²⁰Inkosi yathuma yamthukulula, umbusi wabantu wasemkhulula.

²¹Yambeka waba yinkosi yendlu yayo, lombusi wemfuyo yayo yonke,

²²ukubopha iziphathamandla zayo ngokuthanda kwakhe, afundise abadala bakhe ukuhlakanipha.

²³UIsrayeli wasefika eGibhithe; uJakobe wahlala njengowezizwe elizweni lakoHamu.

²⁴Wenza abantu bayo bazale kakhulu, yabenza baba lamandla kulezitha zabo.

²⁵Yaphendula inhliziyo yabo ukuzonda abantu bayo, ukuthi baphathe inceku zayo ngobuqili.

²⁶Yasithuma uMozisi inceku yayo, uAroni eyayimkhethile.

²⁷Babeka phakathi kwabo izinto zezibonakaliso zayo, lezimangaliso elizweni lakoHamu.

²⁸Yathumela umnyama, yenza kwaba mnyama; njalo kabavukelanga ilizwi layo.

²⁹Yaphendula amanzi abo aba ligazi, yabulala inhlanzi zawo.

³⁰Ilizwe labo lanyakazela amaxoxo, emakamelweni amakhosi abo.

³¹Yakhuluma, kwavela umtshitshi wezibawu, intwala emngceleni wabo wonke.

³²Yabanika isiqhotho saba lizulu, umlilo olamalangabi elizweni labo.

³³Yasitshaya isivini sabo lomkhiwa wabo, yephula izihlahla zomngcele wabo.

³⁴Yakhuluma, kwasekuvela isikhonyane lemihogoyi, okungelakubalwa,

³⁵okwaqeda yonke imibhida elizweni labo, kwaqeda isithelo somhlabathi wabo.

³⁶Yasitshaya amazibulo wonke elizweni labo, okokuqala kwamandla abo wonke.

³⁷Yasibakhupha belesiliva legolide, njalo kwakungekho owakhubekayo phakathi kwezizwe zabo.

³⁸IGibhithe yathokoza ekuphumeni kwabo, ngoba uvalo ngabo lwabehlela.

³⁹Yendlala iyezi laba yisisibekelo, lomlilo wokukhanyisa e busuku.

⁴⁰Bacela, yasiletha izagwaca, yabasuthisa ngesinkwa samazulu.

⁴¹Yavula idwala, kwampompoza amanzi; ahamba endaweni ezomileyo njeng omfula.

⁴²Ngoba yakhumbula ilizwi layo elingcwele, uAbrahama inceku yayo.

⁴³Yasikhupha abantu bayo ngentokozo, abakhethiweyo bayo ngenjabulo.

⁴⁴Yasibanika amazwe abezizwe, njalo badla ilifa lomtshikatshika wabantu,

⁴⁵ukuze bagcine izimiso zayo, balondoloze imilayo yayo. Dumisani i Nkosi !