Read Ndebele-IBhayibhili Elingcwele 2006 Amarhubo 18 Bible Online

Amarhubo 18 - Ndebele-IBhayibhili Elingcwele 2006 bible

Amarhubo 18

²I Nkosi ilidwala lami, lenqaba yami, lomkhululi wami; uNkulunkulu wami, idwala lami, engizaphephela kulo, isihlangu sami, lophondo losindiso lwami, inqaba yami ephakemeyo.

³Ngizabiza i Nkosi edumisekayo, ngakho ngizasindiswa ezitheni zami.

⁴Izibopho zokufa zangizingelezela, lezikhukhula zobubi zangethusa.

⁵Izibopho zesihogo zangigombolozela, imijibila yokufa yayiphambi kwami.

⁶Ekuhluphekeni kwami ngayibiza i Nkosi, ngakhala kuNkulunkulu wami; walizwa ilizwi lami esethempelini lakhe, lokukhala kwami kweza phambi kwakhe, endlebeni zakhe.

⁷Khona umhlaba wazamazama, wanyikinyeka, lezisekelo zezintaba zaqhaqhazela, zazamazama, ngoba wayethukuthele.

⁸Kwenyuka intuthu emakhaleni akhe, lomlilo ophuma emlonyeni wakhe waqothula; amalahle avuthiswa yiwo.

⁹Wasekhothamisa amazulu, wehlela phansi, lomnyama onzima wawungaphansi kwenyawo zakhe.

¹⁰Wasegada ikherubhi*, waphapha, wandiza phezu kwempiko zomoya.

¹¹Wamisa umnyama waba yindawo yakhe yensitha, idumba lakhe inhlangothi zonke zakhe, amanzi amnyama, amayezi amnyama omkhathi.

¹²Ekukhazimuleni okuphambi kwakhe amayezi akhe amnyama edlula, isiqhotho lamalahle omlilo.

¹³I Nkosi yasiduma emazulwini, oPhezukonke wazwakalisa ilizwi lakhe, isiqhotho lamalahle omlilo.

¹⁴Yasithuma imitshoko yayo, yabachitha; lemibane eminengi, yabaphaphathekisa.

¹⁵Khona kwabonakala amaphansi amanzi, kwembulwa izisekelo zomhlaba ekusoleni kwakho, Nkosi, ekuvutheleni komoya wamakhala akho.

¹⁶Yathuma iphezulu, yangibamba, yangenyula emanzini amanengi.

¹⁷Yangophula esitheni sami esilamandla, lakibo abangizondayo, ngoba babelamandla kulami.

¹⁸Babephambi kwami esukwini lwenhlupheko yami, kodwa i Nkosi yaba yisisekelo sami.

¹⁹Yangikhuphela endaweni ebanzi, yangikhulula ngoba yayithokoza ngami.

²⁰I Nkosi yangivuza njengokulunga kwami; yangibuyisela njengokuhlanzeka kwezandla zami.

²¹Ngoba ngizilondolozile indlela ze Nkosi, kangisukanga kuNkulunkulu wami ngenkohlakalo.

²²Ngoba zonke izahlulelo zayo zaziphambi kwami, lezimiso zayo kangiziphambulanga kimi.

²³Njalo ngangiqondile kuyo, ngizinqandile ebubini bami.

²⁴Ngakho i Nkosi ingibuyisele njengokulunga kwami, njengokuhlanzeka kwezandla zami phambi kwamehlo ayo.

²⁵Kolesihawu uzaziveza ulesihawu; koqotho uzaziveza uqotho;

²⁶kohlanzekileyo uzaziveza uhlanzekile; lakophambukileyo uzaziveza uphambukile.

²⁷Ngoba wena uzabasindisa abantu abahlutshwayo; kodwa amehlo aphakemeyo uzawehlisela phansi.

²⁸Ngoba wena uzalumathisa isibane sami; i Nkosi, uNkulunkulu wami, izakhanyisa ubumnyama bami.

²⁹Ngoba ngawe ngigijimile ngadabula phakathi kwebutho, langoNkulunkulu wami ngeqe umthangala.

³⁰UNkulunkulu, indlela yakhe iphelele; ilizwi le Nkosi lihloliwe; uyisihlangu kubo bonke abaphephela kuye.

³¹Ngoba ngubani onguNkulunkulu ngaphandle kwe Nkosi? Njalo ngubani olidwala ngaphandle kukaNkulunkulu wethu?

³²NguNkulunkulu ongibhincisa amandla, owenza indlela yami iphelele.

³³Owenza inyawo zami zibe njenge ze zimpala, wangimisa ezingqongeni zami.

³⁴Ofundisela izandla zami impi, ukuze idandili lethusi ligotshiswe zingalo zami.

³⁵Unginikile lesihlangu sosindiso lwakho, lesandla sakho sokunene singisekele, lobumnene bakho bungikhulisile.

³⁶Wenze zaba banzi izinyathelo zami ngaphansi kwami, ukuze inyawo zami zingatsheleli.

³⁷Ngixotshene lezitha zami, ngazifica, kangibuyanga ngaze ngaziqeda.

³⁸Ngazigwaza, zaze zehluleka ukuvuka, zawa ngaphansi kwenyawo zami.

³⁹Ngoba ungibhincise amandla kusenzelwa impi, wabakhothamisela phansi kwami abangivukelayo.

⁴⁰Unginike intamo yezitha zami, labo abangizondayo ngababhubhisa.

⁴¹Bakhala, kodwa engekho umsindisi; e Nkosi ni, kodwa kayibaphendulanga.

⁴²Ngasengibacholisisa njengothuli phambi komoya, ngabachitha njengodaka lwezitalada.

⁴³Wangikhulula ekuphikiseni kwabantu, wangimisa ngaba yinhloko yezizwe; abantu engangingabazi bangisebenzela.

⁴⁴Bangenela ukuzwa ngendlebe bazangilalela, abezizweni bazazithoba kimi ngokuzenzisa.

⁴⁵Abezizweni bazabuna, baphume ezinqabeni zabo bethuthumela.

⁴⁶I Nkosi iyaphila; njalo kalibusiswe idwala lami, kaphakanyiswe uNkulunkulu wosindiso lwami.

⁴⁷UNkulunkulu onginika impindiselo, lowehlisela izizwe ngaphansi kwami;

⁴⁸ongikhulula ezitheni zami; yebo, phezu kwabangivukelayo wangiphakamisa, emuntwini wodlakela wangikhulula.

⁴⁹Ngenxa yalokhu ngizakudumisa, Nkosi, phakathi kwezizwe, ngihubele ibizo lakho indumiso.

⁵⁰Iyanika inkosi yayo usindiso olukhulu, isenzela ogcotshiweyo wayo umusa, kuDavida, lenzalweni yakhe kuze kube nininini.