Read Ndebele-IBhayibhili Elingcwele 2006 Amarhubo 27 Bible Online

Amarhubo 27 - Ndebele-IBhayibhili Elingcwele 2006 bible

Amarhubo 27

¹I Nkosi iyikukhanya kwami losindiso lwami; ngizakwesaba bani? I Nkosi ingamandla empilo yami; ngizakwethuka bani?

²Lapho ababi, izitha zami labamelana lami, besondela kimi ukudla inyama yami, bona bakhubeka bawa.

³Loba ibutho lingamisa inkamba limelene lami, inhliziyo yami kayiyikwesaba; loba impi ingangivukela, kulokhu ngizathemba.

⁴Into yinye engiyicela e Nkosi ni, yiyo engizayidinga, yikuthi ngihlale endlini ye Nkosi insuku zonke zempilo yami, ukuze ngibone ubuhle be Nkosi, ngibuzisise ethempelini layo.

⁵Ngoba izangifihla edumbeni layo ngosuku lobubi, ingifihle ekusithekeni kwethente layo, ingiphakamisele edwaleni.

⁶Khathesi-ke ikhanda lami lizaphakanyiswa phezu kwezitha zami ezingihanqileyo; ngakho ngizanikela iminikelo yokuthaba ethenteni layo; ngizahlabela, yebo ngihlabele indumiso e Nkosi ni.

⁷Zwana, Nkosi, ilizwi lami lapho ngikhala, njalo ungihawukele, ungiphendule.

⁸Uthe: Dingani ubuso bami. Inhliziyo yami yathi kuwe: Ubuso bakho, Nkosi, ngizabudinga.

⁹Ungangifihleli ubuso bakho; ungayixotshi inceku yakho ngokuthukuthela; ubulusizo lwami; ungangitshiyi, ungangideli, Nkulunkulu wosindiso lwami.

¹⁰Lapho umama lobaba bengitshiya, khona i Nkosi izangemukela.

¹¹Ngifundisa indlela yakho, Nkosi, ungikhokhele endleleni eqondileyo, ngenxa yezitha zami.

¹²Unganginikeli entandweni yezitha zami, ngoba abafakazi bamanga bangivukele, lovutha isihluku.

¹³Ngangizaphela ngaphandle kokuthi ngakholwa ukuthi ngizabona okuhle kwe Nkosi elizweni labaphilayo.

¹⁴Lindela i Nkosi, ube lamandla, izaqinisa inhliziyo yakho, yebo, lindela i Nkosi.