Read Ndebele-IBhayibhili Elingcwele 2006 Amarhubo 33 Bible Online

Amarhubo 33 - Ndebele-IBhayibhili Elingcwele 2006 bible

Amarhubo 33

¹Thokozani e Nkosi ni, balungileyo. Ukudumisa kubafanele abaqotho.

²Dumisani i Nkosi ngechacho, lihlabelele kuyo ngogubhu olulentambo ezilitshumi.

³Ihlabeleleni ingoma entsha, litshaye kuhle ngenhlokomo.

⁴Ngoba ilizwi le Nkosi liqotho, lomsebenzi wayo wonke ngowobuqotho.

⁵Ithanda ukulunga lesahlulelo; umhlaba ugcwele umusa we Nkosi.

⁶Ngelizwi le Nkosi amazulu enziwa, lalo lonke ibutho lawo ngomoya womlomo wayo.

⁷Ibuthelela amanzi olwandle njengenqumbi, ifake inziki eziphaleni.

⁸Umhlaba wonke kawuyesabe i Nkosi, bonke abakhileyo bomhlaba kabathuthumele ngayo.

⁹Ngoba yona yakhuluma, kwaba khona; yona yalaya, kwema.

¹⁰I Nkosi ichitha icebo lezizwe, iphuthisa imicabango yabantu.

¹¹Icebo le Nkosi limi kuze kube nininini, imicabango yenhliziyo yayo ezizukulwaneni ngezizukulwana.

¹²Sibusisiwe isizwe esiNkulunkulu waso yi Nkosi, abantu ebakhethileyo baba yilifa layo.

¹³I Nkosi iyakhangela phansi isemazulwini, ibone bonke abantwana babantu.

¹⁴Isendaweni emisiweyo yokuhlala kwayo ikhangela bonke abakhileyo bomhlaba.

¹⁵Ibumba inhliziyo yabo bonke, inanzelele zonke izenzo zabo.

¹⁶Kayikho inkosi esindiswa yibunengi bebutho, iqhawe kalikhululwa ngamandla amakhulu.

¹⁷Ibhiza liyize ekunqobeni, njalo kalikhululi ngobukhulu bamandla alo.

¹⁸Khangela, ilihlo le Nkosi liphezu kwabayesabayo, kwalabo abathembela emuseni wayo,

¹⁹ukukhulula umphefumulo wabo ekufeni, lokubaphilisa endlaleni.

²⁰Umphefumulo wethu ulindela i Nkosi; ilusizo lwethu lesihlangu sethu.

²¹Ngoba inhliziyo yethu izathokoza kuyo, ngoba sithembele ebizweni layo elingcwele.

²²Umusa wakho, Nkosi, kawube phezu kwethu, njengokulindela kwethu kuwe.