Read Ndebele-IBhayibhili Elingcwele 2006 Amarhubo 41 Bible Online

Amarhubo 41 - Ndebele-IBhayibhili Elingcwele 2006 bible

Amarhubo 41

¹Ubusisiwe onanzelela obuthakathaka. I Nkosi izamkhulula ngosuku lobubi.

²I Nkosi izamlondoloza, imgcine ephila; uzabusiswa emhlabeni; kawuyikumnikela entandweni yezitha zakhe.

³I Nkosi izamsekela embhedeni wokugula kwakhe; wena uzalungisa lonke icansi lakhe emkhuhlaneni wakhe.

⁴Mina ngathi: Nkosi, woba lomusa kimi, silisa umphefumulo wami, ngoba ngonile kuwe.

⁵Izitha zami zikhuluma okubi ngami zisithi: Uzakufa nini, lebizo lakhe lichitheke?

⁶Lalapho efika uku ngi bona, ukhuluma inkohliso; inhliziyo yakhe izibuthela okubi, esephumile phandle akhulume.

⁷Bonke abangizondayo banyenyezelana bemelene lami, bangisongele ukungona.

⁸Into embi inamathele kuye; njalo njengoba elele phansi kasayikuvuka.

⁹Yebo, indoda ebilokuthula lami engiyithembayo, ebikade isidla isinkwa sami, ingiphakamisele isithende imelene lami.

¹⁰Kodwa, wena Nkosi, woba lomusa kimi, ungilulamise ukuze ngibaphindisele.

¹¹Ngalokhu ngiyazi ukuthi uyangithanda, ngoba isitha sami kasithabanga phezu kwami.

¹²Kodwa mina, ungisekele ebuqothweni bami, wangimisa phambi kwakho kuze kube nininini.

¹³Kayibusiswe i Nkosi, uNkulunkulu kaIsrayeli, kusukela phakade kuze kube phakade. Ameni, loAmeni.