Read Ndebele-IBhayibhili Elingcwele 2006 Amarhubo 44 Bible Online

Amarhubo 44 - Ndebele-IBhayibhili Elingcwele 2006 bible

Amarhubo 44

¹Nkulunkulu, sizwile ngendlebe zethu, obaba basitshelile, umsebenzi owawenza ensukwini zabo, ensukwini zendulo.

²Wena ngesandla sakho wazixotsha izizwe elifeni, wabahlanyela bona; wazihlupha izizwe, kodwa wabandisa bona.

³Ngoba kabadlanga ilifa lelizwe ngenkemba yabo, lengalo yabo kayibasindisanga, kodwa isandla sakho sokunene, lengalo yakho, lokukhanya kobuso bakho, ngoba wawubathanda.

⁴Wena uyiNkosi yami, Nkulunkulu; laya ukukhululwa kukaJakobe.

⁵Ngawe sizadudula izitha zethu; ngebizo lakho sizabanyathelela phansi abasivukelayo.

⁶Ngoba kangithembeli kulo idandili lami, lenkemba yami kayiyikungisindisa.

⁷Kodwa usisindisile ezitheni zethu, wayangisa abasizondayo.

⁸KuNkulunkulu siyazincoma usuku lonke; lebizo lakho sizalidumisa kuze kube nininini. Selah.

⁹Kodwa ulahlile wasiyangisa, njalo kawuphumi lamabutho ethu.

¹⁰Usenze ukuthi sibuyele emuva sisuka esitheni; labasizondayo baziphangela.

¹¹Usinikele njengezimvu zokudliwa, wasichithachitha phakathi kwezizwe.

¹²Uthengisile abantu bakho ngokungelanotho, awuzuzanga lutho ngentengo yabo.

¹³Usenze saba lihlazo kwabakhelene lathi, inhlekisa lendumazo kwabasiphahlileyo.

¹⁴Usenze saba yisiga phakathi kwezizwe, ukunikinwa kwekhanda phakathi kwabantu.

¹⁵Usuku lonke ukudunyazwa kwami kuphambi kwami, lehlazo lobuso bami lingigubuzele,

¹⁶ngenxa yelizwi lomgconi lomhlambazi, ngenxa yesitha lomphindiseli.

¹⁷Konke lokhu kusehlele, kube kanti kasikukhohlwanga, kasenzanga ngenkohliso esivumelwaneni sakho.

¹⁸Inhliziyo yethu kayibuyelanga emuva, lezinyathelo zethu kaziphambukanga emkhondweni wakho,

¹⁹lanxa usichobozile endaweni yamaganyana, usembese ngethunzi lokufa.

²⁰Uba besilikhohliwe ibizo likaNkulunkulu wethu, loba selulela izandla zethu kunkulunkulu wezizweni,

²¹uNkulunkulu ubengayikukuhlola lokhu yini? Ngoba uyayazi imfihlo yenhliziyo.

²²Yebo, ngenxa yakho siyabulawa usuku lonke, kuthiwa sinjengezimvu zokuhlatshwa.

²³Phaphama, ulaleleni, Nkosi? Vuka, ungalahli kokuphela.

²⁴Ufihlelani ubuso bakho, ukhohlwe ukuhlupheka kwethu locindezelo lwethu?

²⁵Ngoba umphefumulo wethu ukhothamele othulini, isisu sethu sinamathela emhlabathini.

²⁶Sukumela usizo lwethu, usihlenge ngenxa yomusa wakho.