Read Ndebele-IBhayibhili Elingcwele 2006 Amarhubo 71 Bible Online

Amarhubo 71 - Ndebele-IBhayibhili Elingcwele 2006 bible

Amarhubo 71

¹Kuwe, Nkosi, ngiyaphephela; kangingayangeki lanininini.

²Ngikhulula ngokulunga kwakho, ungophule; beka indlebe yakho kimi, ungisindise.

³Woba lidwala lokuhlala kimi, ngiye kulo njalonjalo; ulayile ukungisindisa, ngoba ulidwala lami lenqaba yami.

⁴Nkulunkulu wami, ngophula esandleni somubi lesandleni songalunganga lolesihluku.

⁵Ngoba wena, ulithemba lami Nkosi, Jehova, ithemba lami kwasebutsheni bami.

⁶Ngeyame kuwe kwasesizalweni; nguwe owangikhupha esiswini sikamama; indumiso yami ingawe njalonjalo.

⁷Benginjengesimangaliso kwabanengi; kodwa wena uyisiphephelo sami esiqinileyo.

⁸Umlomo wami kawugcwaliswe ngendumiso yakho, usuku lonke ngodumo lwakho.

⁹Ungangilahli esikhathini sokuluphala, ungangitshiyi ekupheleni kwamandla ami.

¹⁰Ngoba izitha zami zikhuluma zimelene lami, labacathamela umphefumulo wami bayacebisana,

¹¹besithi: UNkulunkulu umtshiyile; zingelani, limbambe, ngoba kakho okhululayo.

¹²Nkulunkulu, ungabi khatshana lami; Nkulunkulu wami, phangisela usizo lwami.

¹³Kabayangeke baphele abayizitha zomphefumulo wami, kabasitshekelwe yikuyangeka lehlazo labo abadinga ukoniwa kwami.

¹⁴Kodwa mina ngizathemba njalonjalo, ngengeze ekudunyisweni kwakho konke.

¹⁵Umlomo wami uzalandisa ukulunga kwakho, usuku lonke usindiso lwakho, ngoba kangiwazi amanani akho.

¹⁶Ngizahamba emandleni eNkosi uJehova, ngiqambe ukulunga kwakho, okwakho kuphela.

¹⁷Nkulunkulu, ungifundisile kusukela ebutsheni bami, njalo kuze kube khathesi ngitshumayele izimangaliso zakho.

¹⁸Lalapho sengiluphele sengiyimpunga, Nkulunkulu, ungangitshiyi, ngize ngitshumayele ingalo yakho kuso isizukulwana, amandla akho kuye wonke ozakuza.

¹⁹Lokulunga kwakho, Nkulunkulu, kufika ezingqongeni, owenze izinto ezinkulu; Nkulunkulu, ngubani onjengawe?

²⁰Ongenze ngabona inhlupheko ezinengi lezibuhlungu, uzangivuselela futhi, ungikhuphule futhi ezinzikini zomhlaba.

²¹Uzakwandisa ubukhulu bami, ungiduduze inhlangothi zonke.

²²Lami ngizakudumisa ngogubhu lwezintambo, iqiniso lakho, Nkulunkulu wami; ngizahlabelela izibongo kuwe ngechacho, wena ongcwele kaIsrayeli.

²³Indebe zami zizamemeza ngentokozo lapho ngihlabelela kuwe, lomphefumulo wami owuhlengileyo.

²⁴Futhi ulimi lwami luzakhuluma ngokulunga kwakho usuku lonke, ngoba bayangekile, ngoba badumazeka, abadinga ukoniwa kwami.