Read Ndebele-IBhayibhili Elingcwele 2006 Amarhubo 72 Bible Online

Amarhubo 72 - Ndebele-IBhayibhili Elingcwele 2006 bible

Amarhubo 72

¹Nkulunkulu, nika inkosi izahlulelo zakho lokulunga kwakho endodaneni yenkosi.

²Izakwehlulela abantu bakho ngokulunga, labayanga bakho ngokuqonda.

³Izintaba zizalethela abantu ukuthula, lamaqaqa, ngokulunga.

⁴Izakwahlulela abahluphekayo babantu, isindise abantwana babaswelayo, ifohloze umcindezeli.

⁵Bazakwesaba wena lisekhona ilanga, isekhona lenyanga, ku zizukulwana nge zizukulwana.

⁶Izakwehla njengezulu etshanini obugundiweyo, njengezihlambo ezithambisa umhlaba.

⁷Ensukwini zayo olungileyo uzahluma; lokwanda kokuthula, ize ingabi khona inyanga.

⁸Izabusa-ke kusukela elwandle kusiya elwandle, lakusukela emfuleni kusiya emikhawulweni yomhlaba.

⁹Abahlala enkangala bazakhothama phambi kwayo; izitha zayo zizakhotha uthuli.

¹⁰Amakhosi eTarshishi lawezihlengeni azaletha izipho, amakhosi eShebha leSeba asondeze izipho.

¹¹Amakhosi wonke azayikhothamela, izizwe zonke ziyikhonze.

¹²Ngoba izamkhulula oswelayo ekhala, longumyanga, longelamsizi.

¹³Izahawukela ongumyanga loswelayo, isindise imiphefumulo yabaswelayo.

¹⁴Izahlenga umphefumulo wabo enkohlisweni ledlakeleni; legazi labo lizakuba ligugu emehlweni ayo.

¹⁵Izaphila, inikwe okwegolide leShebha, ikhulekelwe njalonjalo, usuku lonke ibusiswe.

¹⁶Kuzakuba khona ihetshezana lamabele elizweni ezingqongeni zezintaba; izithelo zawo zihatshazele njengeLebhanoni; labomuzi bazahluma njengotshani bomhlaba.

¹⁷Ibizo layo lizakuba khona kuze kube phakade, lebizo layo lizaqhutshelwa phambili lisekhona ilanga. Njalo bazabusiswa kuyo; izizwe zonke zizakuthi ibusisiwe.

¹⁸Kayibusiswe i Nkosi uNkulunkulu, uNkulunkulu kaIsrayeli, onguye yedwa owenza imimangaliso.

¹⁹Kalibusiswe ibizo lakhe elilodumo kuze kube nininini; umhlaba wonke ugcwaliswe ngodumo lwakhe. Ameni, loAmeni!

²⁰Imikhuleko kaDavida indodana kaJese isiphelile.