Read Ndebele-IBhayibhili Elingcwele 2006 Amarhubo 80 Bible Online

Amarhubo 80 - Ndebele-IBhayibhili Elingcwele 2006 bible

Amarhubo 80

¹Melusi kaIsrayeli, beka indlebe, okhokhela uJosefa njengomhlambi, ohlezi phakathi kwamakherubi*, khanyisa.

²Phambi kukaEfrayimi loBhenjamini loManase vusa amandla akho, uze ube lusindiso lwethu.

³Siphendule, Nkulunkulu, wenze ubuso bakho bukhanye, ngakho sizasindiswa.

⁴Nkosi Nkulunkulu wamabandla, koze kube nini uthukuthelela umkhuleko wabantu bakho?

⁵Ubenze badla isinkwa sezinyembezi, wabanathisa izinyembezi ngesilinganiso esikhulu.

⁶Usenza sibe yingxabano kubomakhelwane bethu, lezitha zethu ziyahlekisana ngathi.

⁷Siphendule, Nkulunkulu wamabandla, wenze ubuso bakho bukhanye, ngakho sizasindiswa.

⁸Waliletha ivini livela eGibhithe, wazixotsha izizwe, walihlanyela lona.

⁹Walungisa indawo phambi kwalo, wagxilisa impande zalo, laze lagcwala umhlaba.

¹⁰Izintaba zembeswa ngomthunzi walo, lezingatsha zalo zi njenge misedari kaNkulunkulu.

¹¹Lanabisela ingatsha zalo elwandle, lamahlumela alo emfuleni.

¹²Uyibhobozeleni imiduli yalo, ukuze balikhe bonke abadlula ngendlela?

¹³Ingulube yasehlathini iyalihlikiza, lenyamazana yeganga iyalidla.

¹⁴Nkulunkulu wamabandla, akubuyele, ukhangele phansi usemazulwini, ubone, wethekelele lelivini,

¹⁵ngitsho ivini isandla sakho sokunene esalihlanyelayo, logatsha o waziqinisela lona.

¹⁶Lutshisiwe ngomlilo, lwaqunyelwa phansi; bayabhubha ngokukhuza kobuso bakho.

¹⁷Isandla sakho kasibe phezu komuntu wesandla sakho sokunene, phezu kwendodana yomuntu, o ziqinisele yona.

¹⁸Ngakho kasiyikubuyela emuva sisuke kuwe; sivuselele, khona sizabiza ibizo lakho.

¹⁹Nkosi, Nkulunkulu wamabandla, siphendule, wenze ubuso bakho bukhanye, ngakho sizasindiswa.