Read Ndebele-IBhayibhili Elingcwele 2006 Amarhubo 86 Bible Online

Amarhubo 86 - Ndebele-IBhayibhili Elingcwele 2006 bible

Amarhubo 86

¹Beka indlebe yakho, Nkosi, ungiphendule, ngoba ngingumyanga, ngiyaswela.

²Londoloza umphefumulo wami, ngoba ngiyamesaba uNkulunkulu; wena Nkulunkulu wami, sindisa inceku yakho ekuthembayo.

³Woba lesihawu kimi, Nkosi, ngoba ngikhala kuwe usuku lonke.

⁴Thokozisa umphefumulo wenceku yakho, ngoba kuwe, Nkosi, ngiyawuphakamisela umphefumulo wami.

⁵Ngoba wena, Nkosi, ulungile, ungothethelelayo; umkhulu emuseni kubo bonke abakubizayo.

⁶Beka indlebe, Nkosi, emkhulekweni wami; ulalele ilizwi lokuncenga kwami.

⁷Ngosuku lokuhlupheka kwami ngizakhala kuwe, ngoba uzangiphendula.

⁸Kakho ofanana lawe phakathi kwabonkulunkulu, Nkosi, njalo enjengemisebenzi yakho kayikho.

⁹Izizwe zonke ozenzileyo zizakuza zikhothame phambi kwakho, Nkosi, zidumise ibizo lakho.

¹⁰Ngoba wena umkhulu, wenza izinto ezimangalisayo, unguNkulunkulu wena wedwa.

¹¹Ngifundisa indlela yakho, Nkosi, ngizahamba eqinisweni lakho; hlanganisa inhliziyo yami ukuze yesabe ibizo lakho.

¹²Ngizakudumisa, Nkosi Nkulunkulu wami, ngenhliziyo yami yonke; ngilidumise ibizo lakho kuze kube nininini.

¹³Ngoba umusa wakho phezu kwami mkhulu; njalo wakhulula umphefumulo wami esihogweni esingaphansi kakhulu.

¹⁴Nkulunkulu, abazigqajayo bangivukele, lemibuthano yabalobudlwangudlwangu idinga umphefumulo wami; njalo kabakubekanga phambi kwabo.

¹⁵Kodwa wena, Nkosi, unguNkulunkulu olozwelo, lolesisa, ophuza ukuthukuthela, lomkhulu emuseni leqinisweni.

¹⁶Phendukela kimi, ungihawukele; uyiphe inceku yakho amandla akho, usindise indodana yencekukazi yakho.

¹⁷Ngenzela isiboniso sokuhle, ukuze labo abangizondayo babone bayangeke, ngoba wena, Nkosi, ungisizile wangiduduza.