Read Ndebele-IBhayibhili Elingcwele 2006 Amarhubo 92 Bible Online

Amarhubo 92 - Ndebele-IBhayibhili Elingcwele 2006 bible

Amarhubo 92

¹Kuhle ukubonga i Nkosi, lokuhlabela indumiso ebizweni lakho, wena oPhezukonke;

²ukutshumayela uthandolomusa lwakho ekuseni, lothembeko lwakho ebusuku bonke,

³ngechacho elilentambo ezilitshumi, langogubhu lwezintambo, ngechacho elikhala kamnandi.

⁴Ngoba ungithokozisile, Nkosi, ngomsebenzi wakho; ngizamemeza ngenjabulo ngemisebenzi yezandla zakho.

⁵Mikhulu kangakanani imisebenzi yakho, Nkosi ! Izikile kakhulu imicabango yakho.

⁶Isiphukuphuku kasazi, lesithutha kasikuqedisisi lokhu.

⁷Lapho ababi behluma njengotshani, labo bonke abenzi bobubi bekhahlela, kuyi kuze babhujiswe kuze kube phakade.

⁸Kodwa wena, Nkosi, uphakeme kuze kube nininini.

⁹Ngoba khangela, izitha zakho, Nkosi, ngoba khangela, izitha zakho zizabhubha; bonke abenzi bobubi bazachitheka.

¹⁰Kodwa uzaphakamisa uphondo lwami njengolwenyathi; ngizagcotshwa ngamafutha amatsha.

¹¹Lelihlo lami lizabukela izitha zami, indlebe zami zizakuzwa mayelana lababi abangivukelayo.

¹²Olungileyo uzahluma njengesihlahla selala, akhule njengomsedari eLebhanoni.

¹³Abahlanyelwe endlini ye Nkosi, bazahluma emagumeni kaNkulunkulu wethu.

¹⁴Bazabe belokhu bethela izithelo ebudaleni babo, bakhuluphale babeluhlaza,

¹⁵ukutshumayela ukuthi i Nkosi i qondile; ilidwala lami, njalo ka ku kho ukungalungi kiyo.