Read Ndebele-IBhayibhili Elingcwele 2006 Izaga 13 Bible Online

Izaga 13 - Ndebele-IBhayibhili Elingcwele 2006 bible

Izaga 13

¹Indodana ehlakaniphileyo ilalela ukulaya kukayise, kodwa isideleli kasilaleli ukukhuzwa.

²Umuntu uzakudla okuhle okuvela esithelweni somlomo, kodwa umphefumulo weziphambuki ubudlwangudlwangu.

³Olondoloza umlomo wakhe ugcina umphefumulo wakhe, kodwa ovula indebe zakhe zibe banzi uzakuba lencithakalo.

⁴Umphefumulo wevila uyafisa, kodwa kakulalutho; kodwa umphefumulo wokhutheleyo uyakhuluphaliswa.

⁵Olungileyo uyalizonda ilizwi lamanga; kodwa omubi uzenza abe levumba, uthelela ihlazo.

⁶Ukulunga kulinda oqotho endleleni, kodwa inkohlakalo ichitha isoni.

⁷Kukhona ozitshaya onothileyo, kanti kalalutho; ozitshaya ongumyanga, kanti u nothile kakhulu.

⁸Inhlawulo yempilo yomuntu yinotho yakhe, kodwa umyanga kezwa ukukhuzwa.

⁹Ukukhanya kwabalungileyo kuyathokoza, kodwa isibane sabakhohlakeleyo sizacitshwa.

¹⁰Ukuzigqaja kuveza ingxabano kuphela, kodwa inhlakanipho ikwabalulekiweyo.

¹¹Inotho etholakala ngokuyize izaphunguka, kodwa obuthelela ngesandla uya y andisa.

¹²Ithemba eliphuzayo ligulisa inhliziyo, kodwa isifiso esizayo siyisihlahla sempilo.

¹³Odelela ilizwi yena uzachithwa, kodwa owesaba umlayo yena uzavuzwa.

¹⁴Imfundiso yohlakaniphileyo ingumthombo wempilo, ukuthi asuke emijibileni yokufa.

¹⁵Ukuqedisisa okuhle kunika umusa, kodwa indlela yabaphambukayo ilukhuni.

¹⁶Wonke ohlakaniphileyo wenza ngolwazi, kodwa isithutha sichaya ubuthutha.

¹⁷Isithunywa esikhohlakeleyo siwela ebubini, kodwa isithunywa esithembekileyo siyikusilisa.

¹⁸Ubuyanga lehlazo ngokwalowo oyekela ukufundiswa, kodwa onanzelela ukukhuzwa uzadunyiswa.

¹⁹Isifiso esenziweyo simnandi emphefumulweni, kodwa kuyisinengiso ezithutheni ukuphenduka ebubini.

²⁰Ohamba labahlakaniphileyo uzahlakanipha, kodwa umngane wezithutha uzaqamuka.

²¹Ububi buzazingela izoni, kodwa abalungileyo bazavuzwa ngokuhle.

²²Olungileyo uzabenza abantwana babantwana badle ilifa, kodwa inotho yesoni ibekelwa olungileyo.

²³Ukudla okunengi kusengqathweni yabayanga, kodwa kukhona okukhukhulwa ngokungabi lokwahlulela.

²⁴Ogodla uswazi lwakhe uzonda indodana yakhe, kodwa oyithandayo uyayidinga ngovivi ngesijeziso.

²⁵Olungileyo uyadla kuze kusuthe umphefumulo wakhe, kodwa isisu sabakhohlakeleyo sizaswela.