Read Ndebele-IBhayibhili Elingcwele 2006 Izaga 14 Bible Online

Izaga 14 - Ndebele-IBhayibhili Elingcwele 2006 bible

Izaga 14

¹Wonke owesifazana ohlakaniphileyo uyayakha indlu yakhe, kodwa oyisithutha uyayidiliza ngezandla zakhe.

²Ohamba ngobuqotho bakhe wesaba i Nkosi, kodwa ophambene ngendlela zakhe uyayidelela.

³Emlonyeni wesithutha kulentonga yokuzigqaja, kodwa indebe zabahlakaniphileyo ziyabagcina.

⁴Lapho okungekho izinkabi khona umkolo uhlanzekile, kodwa kulesivuno esinengi ngamandla enkabi.

⁵Umfakazi othembekileyo kaqambi amanga, kodwa umfakazi wamanga uphafuza amanga.

⁶Odelelayo udinga inhlakanipho, kodwa kayikho; kodwa ulwazi lulula koqedisisayo.

⁷Suka phambi komuntu oyisithutha, nxa ungayikunanzelela kuye indebe zolwazi.

⁸Inhlakanipho yokhaliphileyo yikuqedisisa indlela yakhe, kodwa ubuthutha bezithutha buyinkohliso.

⁹Izithutha ziyakloloda ngesono, kodwa phakathi kwabaqotho kulomusa.

¹⁰Inhliziyo iyazi ukubaba kwayo ngokwayo, lowemzini kahlanganyeli lentokozo yayo.

¹¹Indlu yabakhohlakeleyo izachithwa, kodwa ithente labaqotho lizahluma.

¹²Kukhona indlela ebonakala ilungile emuntwini, kodwa ukuphela kwayo zindlela zokufa.

¹³Lekuhlekeni inhliziyo isebuhlungwini, lokuphela kwaleyontokozo lusizi.

¹⁴Ohlehlela nyovane ngenhliziyo uzasutha ngezindlela zakhe, kodwa umuntu olungileyo uzasutha ngaye ngokwakhe.

¹⁵Ongelalwazi ukholwa lonke ilizwi, kodwa olengqondo unanzelela ukuhamba kwakhe.

¹⁶Ohlakaniphileyo uyesaba, asuke ebubini, kodwa isithutha siyathukuthela, silitshapha.

¹⁷Ophangisa ukuthukuthela wenza ubuthutha, lomuntu wamacebo amabi uzazondwa.

¹⁸Abangelalwazi badla ilifa lobuthutha, kodwa abakhaliphileyo bazathwala umqhele wolwazi.

¹⁹Ababi bakhothama phambi kwabalungileyo, labakhohlakeleyo emasangweni abalungileyo.

²⁰Umyanga uzondwa langumakhelwane wakhe, kodwa abathanda onothileyo banengi.

²¹Odelela umakhelwane wakhe uyona, kodwa olomusa kubayanga ubusisiwe.

²²Kabaduhi yini abaceba okubi? Kodwa umusa leqiniso ngokwalabo abaceba okuhle.

²³Kumtshikatshika wonke kulenzuzo, kodwa inkulumo yendebe ibanga inswelo kuphela.

²⁴Umqhele wabahlakaniphileyo uyinotho yabo; ubuthutha bezithutha buyibuthutha.

²⁵Umfakazi oqinisileyo uyophula imiphefumulo, kodwa ophafuza amanga ungumkhohlisi.

²⁶Ekuyesabeni i Nkosi kulethemba eliqinileyo, labantwana bakhe bazakuba lesiphephelo.

²⁷Ukuyesaba i Nkosi kungumthombo wempilo, ukusuka emijibileni yokufa.

²⁸Lusebunengini babantu udumo lwenkosi, kodwa kusekuswelekeni kwabantu ukuchitheka kombusi.

²⁹Ophuza ukuthukuthela ulokuqedisisa okukhulu, kodwa ophangisa ukuzonda ukhulisa ubuthutha.

³⁰Inhliziyo ephilileyo iyimpilo yenyama, kodwa umhawu uyikubola kwamathambo.

³¹Ocindezela umyanga uthuka uMenzi wakhe, kodwa olomusa koswelayo uyamdumisa.

³²Okhohlakeleyo uwiswa ebubini bakhe, kodwa olungileyo ulethemba ekufeni kwakhe.

³³Inhlakanipho ihlala enhliziyweni yoqedisisayo, kodwa okuphakathi kwezithutha kuyaziwa.

³⁴Ukulunga kuphakamisa isizwe, kodwa isono silihlazo ebantwini.

³⁵Umusa wenkosi usencekwini ehlakaniphileyo, kodwa intukuthelo yayo izakuba kw ethela ihlazo.