Read Ndebele-IBhayibhili Elingcwele 2006 Izaga 18 Bible Online

Izaga 18 - Ndebele-IBhayibhili Elingcwele 2006 bible

Izaga 18

¹Ozehlukanisayo udinga okuloyisekayo; ufohlela inhlakanipho yonke.

²Isithutha kasithokozi ekuqedisiseni, kodwa ukuze inhliziyo yaso iziveze.

³Lapho okhohlakeleyo esiza, kuza lokudelela, njalo kanye lenhloni, ihlazo.

⁴Amazwi omlomo womuntu angamanzi azikileyo; umthombo wenhlakanipho uyisifula esigobhozayo.

⁵Kakulunganga ukwemukela ubuso bokhohlakeleyo, ukuphambula olungileyo kusahlulelo.

⁶Indebe zesithutha zingena enkanini, lomlomo waso ubiza imivimvinya.

⁷Umlomo wesithutha uyintshabalalo yaso, lendebe zaso zingumjibila womphefumulo waso.

⁸Amazwi onyeyayo anjengezibondlo ezehlela kokungaphakathi kwesisu.

⁹Lolivila emsebenzini wakhe ungumfowabo womchithi.

¹⁰Ibizo le Nkosi lingumphotshongo oqinileyo; olungileyo uzagijimela kuwo amiswe phezulu evikelekile.

¹¹Inotho yesinothi ingumuzi waso oqinileyo, lanjengomthangala ophakemeyo ekucabangeni kwaso.

¹²Mandulo kokubhujiswa inhliziyo yomuntu iyaziphakamisa, njalo mandulo kodumo kulokuthobeka.

¹³Ophendula indaba engakezwa, kuyibuwula kuye, lehlazo.

¹⁴Umoya womuntu uzasekela ukugula kwakhe, kodwa umoya owephukileyo, ngubani ongawuthwala?

¹⁵Inhliziyo yoqedisisayo izuza ulwazi, lendlebe yabahlakaniphileyo idinga ulwazi.

¹⁶Isipho somuntu siyamvulela ngokubanzi, simkhokhelela phambi kwabakhulu.

¹⁷Ongowokuqala ecaleni lakhe ubonakala elungile, kodwa umakhelwane wakhe ufika amhlole.

¹⁸Inkatho iqeda izingxabano, yehlukanise phakathi kwabalamandla.

¹⁹Umzalwane owoniweyo wedlula umuzi oqinileyo, lengxabano zinjengomgoqo wenqaba.

²⁰Isisu somuntu siyasuthiswa yizithelo zomlomo wakhe, uzasuthiswa yinzuzo yendebe zakhe.

²¹Ukufa lempilo kusesandleni solimi; labaluthandayo bazakudla isithelo salo.

²²Othole umfazi uthole okuhle, uzuze umusa e Nkosi ni.

²³Umyanga uyakhuluma ngo kuncenga, kodwa isinothi siphendula izinto ezilukhuni.

²⁴Umuntu wabangane kumele azitshengise ngobungane, njalo kulomngane onamathela kuleselamani.