Read Ndebele-IBhayibhili Elingcwele 2006 Izaga 22 Bible Online

Izaga 22 - Ndebele-IBhayibhili Elingcwele 2006 bible

Izaga 22

¹Ibizo elihle likhethekile kulenotho enengi; isisa esihle kulesiliva njalo kulegolide.

²Onothileyo lomyanga bayahlangana; i Nkosi yabenza bonke.

³Ohlakaniphileyo ubona ububi acatshe, kodwa abangelalwazi bayaqhubeka babesebejeziswa.

⁴Umvuzo wokuthobeka lo kwesaba i Nkosi, yinotho, lodumo, lempilo.

⁵Ameva le mijibila kusendleleni yabaphambeneyo; ogcina umphefumulo wakhe uzakuba khatshana labo.

⁶Fundisa umntwana ngokwendlela yakhe; ngitsho esemdala kayikuphambuka kuyo.

⁷Onothileyo ubusa abayanga, lomboleki uyisigqili sombolekisi.

⁸Ohlanyela ukonakala uzavuna ukuhlupheka, lentonga yolaka lwakhe izaphela.

⁹Olelihlo elilokuhle yena uzabusiswa, ngoba unikile okwesinkwa sakhe kumyanga.

¹⁰Xotsha isideleli, kuzaphuma lenkani, yebo, ingxabano lehlazo kuzaphela.

¹¹Othanda ukuhlanzeka kwenhliziyo, ngenxa yesisa sendebe zakhe, inkosi ingumgane wakhe.

¹²Amehlo e Nkosi alondoloza ulwazi, kodwa izachitha amazwi abangathembekanga.

¹³Ivila lithi: Kulesilwane ngaphandle; ngizabulawa phakathi kwezitalada.

¹⁴Umlomo wabesifazana bemzini ungumgodi otshonayo; lowo i Nkosi emthukutheleleyo uzawela khona.

¹⁵Ubuthutha bubotshelwe enhliziyweni yomntwana; uswazi lokuqondisa luzabususela khatshana laye.

¹⁶Ocindezela umyanga ukwandisa alakho, opha onothileyo, isibili uzakuba ngoswelayo.

¹⁷Beka indlebe yakho, uzwe amazwi abahlakaniphileyo, umise inhliziyo yakho elwazini lami.

¹⁸Ngoba kumnandi uba uwalondoloza emibilini yakho; azahlala elungile kanyekanye endebeni zakho.

¹⁹Ukuze ithemba lakho libe se Nkosi ni, ngikwazisile wona lamuhla, ngitsho wena.

²⁰Kangikubhalelanga yini izinto ezinhle kakhulu kuzeluleko lelwazini?

²¹Ukukwazisa ukuqiniseka kwamazwi eqiniso, ukuze ubuyisele amazwi eqiniso kulabo abakuthumileyo.

²²Ungamphangi umyanga ngoba engumyanga, njalo ungamchobozi oswelayo esangweni.

²³Ngoba i Nkosi izamela udaba lwabo, iphange umphefumulo wababaphangayo.

²⁴Ungahlanganyeli lomuntu ololaka, ungahambisani lomuntu othukuthelayo,

²⁵hlezi ufunde indlela zakhe, wemukele umjibila emphefumulweni wakho.

²⁶Ungabi phakathi kwababambana izandla, phakathi kwabayizibambiso ngezikwelede.

²⁷Uba ungelakho okokuhlawula, kungani ezathatha umbheda wakho ngaphansi kwakho?

²⁸Ungatshedisi isikhonkwane esidala somngcele, oyihlo abasenzayo.

²⁹Uyambona yini umuntu oyingcitshi emsebenzini wakhe? Uzazimisa phambi kwamakhosi; kayikuzimisa phambi kwabantukazana.