Read Ndebele-IBhayibhili Elingcwele 2006 Izaga 25 Bible Online

Izaga 25 - Ndebele-IBhayibhili Elingcwele 2006 bible

Izaga 25

¹Lalezi yizaga zikaSolomoni abantu bakaHezekhiya inkosi yakoJuda abazikopayo.

²Kuludumo lukaNkulunkulu ukufihla udaba, kodwa kuludumo lwamakhosi ukuhlolisisa udaba.

³Amazulu ngokuphakama, lomhlaba ngokujula, lenhliziyo yamakhosi kakulakuhlolisiswa.

⁴Susa amanyele esiliveni, besekuphuma isitsha somncibilikisi.

⁵Susa okhohlakeleyo phambi kwenkosi, besekuqiniswa isihlalo sayo sobukhosi ngokulunga.

⁶Ungaziqhenyi phambi kwenkosi, njalo ungemi endaweni yezikhulu;

⁷ngoba kungcono kuthiwe kuwe: Yenyukela ngapha, kulokuthi wehliswe phambi kwesiphathamandla, amehlo akho asibonileyo.

⁸Ungaphangisi ukuphuma uku ya phikisana, hlezi wenze ulutho ekucineni kwakho, lapho umakhelwane wakho esekuyangisile.

⁹Mela udaba lwakho lomakhelwane wakho, kodwa ungavezi imfihlo yomunye;

¹⁰hlezi okuzwayo akuyangise, lesigcono sakho singaphambuki.

¹¹Ilizwi elikhulunywe ngokufaneleyo li njeng ama-apula egolide ezitsheni zesiliva ezibaziweyo.

¹²Umkhuzi ohlakaniphileyo endlebeni ezwayo ulisongo legolide lesiceciso segolide elihle.

¹³Isithunywa esithembekileyo kwabasithumileyo sinjengomqando weliqhwa elikhithikayo ngosuku lokuvuna, ngoba sivuselela umphefumulo wamakhosi aso.

¹⁴Umuntu oziqhenya ngesipho samanga u njeng amayezi lomoya okungelazulu.

¹⁵Ngokubekezela umbusi angavunyiswa, lolimi oluthambileyo lwephula ithambo.

¹⁶Utholile yini uluju? Dlana okwenele wena, hlezi uludle kakhulu, uluhlanze.

¹⁷Unyawo lwakho kalungavami endlini kamakhelwane wakho, hlezi akusuthe akuzonde.

¹⁸Umuntu ofakaza ubufakazi bamanga ngomakhelwane wakhe uyisagila lenkemba lomtshoko obukhali.

¹⁹Ukuthemba ongathembekanga ngosuku lokuhlupheka ku njeng ezinyo elephukileyo, lonyawo olwenyeleyo.

²⁰Ohlabelela izingoma enhliziyweni edabukileyo u njeng okhupha isembatho ngosuku lwamakhaza, njenge viniga phakathi kwesoda.

²¹Uba okuzondayo elambile, umnike isinkwa adle, njalo uba omile, umnike amanzi anathe;

²²ngoba uzabekelela amalahle omlilo ekhanda lakhe, le Nkosi izakuvuza.

²³Umoya wenyakatho uletha izulu, lolimi lwemfihlo ubuso obulolaka.

²⁴Kungcono ukuhlala engonsini yophahla kulalowesifazana wezinkani lendlini yokuhlanganyela.

²⁵Umbiko omuhle ovela elizweni elikhatshana unjengamanzi aqandayo emphefumulweni odiniweyo.

²⁶Olungileyo ozanyazanyiswayo phambi kokhohlakeleyo ungumthombo odungekileyo lesiphethu esonakeleyo.

²⁷Ukudla uluju olunengi kakulunganga; ngokunjalo ukudinga udumo lwabo kakusi dumo.

²⁸Umuntu ongathinti umoya wakhe u nje ngomuzi ofohlelweyo ongelamthangala.