Read Ndebele-IBhayibhili Elingcwele 2006 Izaga 28 Bible Online

Izaga 28 - Ndebele-IBhayibhili Elingcwele 2006 bible

Izaga 28

¹Ababi babaleka kungekho umzingeli, kodwa abalungileyo balesibindi njengebhongo lesilwane.

²Ngesiphambeko sesizwe ababusi baso banengi; kodwa ngomuntu olokuqedisisa o lolwazi ngokunjalo sizakwelulwa.

³Umuntu ongumyanga ocindezela abayanga ulizulu elikhukhulayo ukuze kungabi lokudla.

⁴Abadela umlayo badumisa ababi, kodwa labo abagcina umlayo balwa labo.

⁵Abantu ababi kabaqedisisi ukulunga, kodwa abadinga i Nkosi baqedisisa konke.

⁶Kungcono umyanga ohamba ngobuqotho bakhe kulophambene ngezindlela lanxa enothile.

⁷Ogcina umlayo uyindodana eqedisisayo, kodwa ozihlanganisa lezigangi uyangisa uyise.

⁸Owandisa inotho yakhe ngenzalo langenzuzo uyibuthela olomusa kubayanga.

⁹Ophambula indlebe yakhe ekulaleleni umlayo, lomkhuleko wakhe uzakuba yisinengiso.

¹⁰Oduhisela abaqotho endleleni embi yena uzawela emgodini wakhe, kodwa abaqotho bazakudla ilifa lokuhle.

¹¹Indoda enothileyo ihlakaniphile emehlweni ayo, kodwa umyanga oqedisisayo uzayihlola.

¹²Lapho abalungileyo bethokoza, kulenkazimulo enkulu; kodwa nxa ababi bephakama, umuntu uyadingwa.

¹³Osibekela iziphambeko zakhe kayikuphumelela, kodwa o zi vumayo a zi tshiye, uzahawukelwa.

¹⁴Ubusisiwe umuntu owesaba njalonjalo, kodwa owenza inhliziyo yakhe ibe lukhuni uzawela ebubini.

¹⁵Umbusi okhohlakeleyo phezu kwabantu abangabayanga uyisilwane esibhongayo lebhere elizingelayo.

¹⁶Umbusi oswele ukuqedisisa konke wandisa lencindezelo; ozonda inzuzo embi uzakwelula insuku.

¹⁷Umuntu ocindezelwe ligazi lomphefumulo uzabalekela emgodini; kabangamsekeli.

¹⁸Ohamba ngobuqotho uzasindiswa, kodwa ophambene ngendlela ezimbili uzawela kweyodwa.

¹⁹Olima umhlaba wakhe uzasutha ukudla, kodwa olandela abayize uzasutha ubuyanga.

²⁰Umuntu wothembeko lonke uzavama ngezibusiso, kodwa ophangisa ukunotha kayikuba msulwa.

²¹Ukuhlonipha ubuso kakulunganga, ngoba umuntu uzakona ngenxa yocezu lwesinkwa.

²²Ophangisa ukunotha ungumuntu olelihlo elibi, njalo engazi ukuthi ubuyanga buzamehlela.

²³Okhuza umuntu uzathola umusa emuva okwedlula okhohlisayo ngolimi.

²⁴Ophanga uyise kumbe unina, athi: Akusiso isiphambeko; ungumngane womchithi.

²⁵Olomphefumulo obanzi udunga ingxabano, kodwa othemba e Nkosi ni uzakhuluphaliswa.

²⁶Othemba enhliziyweni yakhe uyisithutha, kodwa ohamba ngenhlakanipho uzaphepha.

²⁷Opha umyanga kayikuswela, kodwa ofihla amehlo akhe uzakuba leziqalekiso ezinengi.

²⁸Nxa abakhohlakeleyo bephakanyiswa, umuntu uyacatsha, kodwa nxa bebhubha, abalungileyo bayanda.