Read Ndebele-IBhayibhili Elingcwele 2006 Izaga 29 Bible Online

Izaga 29 - Ndebele-IBhayibhili Elingcwele 2006 bible

Izaga 29

¹Umuntu othi ekhuzwa kanengi aqinise intamo, uzahle ephulwe, njalo kungabi lakusiliswa.

²Lapho abalungileyo bekhula, abantu bayathokoza, kodwa lapho okhohlakeleyo ebusa, abantu bayabubula.

³Umuntu othanda inhlakanipho uthokozisa uyise, kodwa ohlanganyela lamawule uchitha inotho.

⁴Inkosi iqinisa ilizwe ngesahlulelo, kodwa umuntu wezipho uyalichitha.

⁵Umuntu olalisa ngolimi umakhelwane wakhe wendlalela izinyawo zakhe imbule.

⁶Esiphambekweni somuntu omubi kulomjibila, kodwa olungileyo uyamemeza ngenjabulo ethokoza.

⁷Olungileyo uyalwazi udaba lwabayanga; okhohlakeleyo kananzeleli ulwazi.

⁸Abantu abadelelayo bayawuthungela umuzi, kodwa abahlakaniphileyo badedisa ulaka.

⁹Umuntu ohlakaniphileyo emangalelana lomuntu oyisithutha, loba elolaka, loba ehleka, kakulakuthula.

¹⁰Abantu abomele igazi bazonda opheleleyo, kodwa abaqotho badinga umphefumulo wakhe.

¹¹Isithutha sikhupha umoya waso wonke, kodwa ohlakaniphileyo uyawuthibela emuva.

¹²Umbusi olalela amazwi amanga, zonke izinceku zakhe zikhohlakele.

¹³Umyanga lomuntu wencindezelo bayahlangana; i Nkosi ikhanyisa amehlo abo bobabili.

¹⁴Inkosi eyahlulela abayanga ngothembeko, isihlalo sayo sobukhosi sizamiswa phakade.

¹⁵Uswazi lokukhuza kunika inhlakanipho, kodwa umntwana oyekelelwayo uthelela unina inhloni.

¹⁶Lapho abakhohlakeleyo besanda, isiphambeko siyanda, kodwa abalungileyo bazabona ukuwa kwabo.

¹⁷Laya indodana yakho, izakuphumuza; yebo, izanika izinjabulo emphefumulweni wakho.

¹⁸Lapho okungelambono khona, abantu bayadlubulunda; kodwa ubusisiwe ogcina umlayo.

¹⁹Inceku kayilaywa ngamazwi; lanxa iqedisisa, kayiyikuphendula.

²⁰Uyambona yini umuntu ophangisa ngamazwi akhe? Kulethemba elingcono esithutheni kulaye.

²¹Ototoza inceku yakhe kusukela ebuntwaneni, ekucineni izakuba luhlupho kuye.

²²Umuntu ololaka ubanga ukuxabana, lomuntu ovutha intukuthelo wandisa isiphambeko.

²³Ukuzigqaja komuntu kuzamehlisa, kodwa olomoya othobekileyo uzabamba udumo.

²⁴Owabelana lesela uzonda umphefumulo wakhe; uzwa isiqalekiso, angakhulumi.

²⁵Ukwesaba abantu kuletha umjibila, kodwa othemba e Nkosi ni uzabekwa phezulu evikelekile.

²⁶Abanengi badinga ubuso bombusi, kodwa isahlulelo salowo lalowo sivela e Nkosi ni.

²⁷Umuntu ongalunganga uyisinengiso kwabalungileyo, kodwa oqotho endleleni uyisinengiso kokhohlakeleyo.