Read Ndebele-IBhayibhili Elingcwele 2006 Izaga 30 Bible Online

Izaga 30 - Ndebele-IBhayibhili Elingcwele 2006 bible

Izaga 30

¹Amazwi kaAguri indodana kaJake umMasa. Umuntu wathi kuIthiyeli, kuIthiyeli loUkhali:

²Isibili, ngiyisithutha kulomuntu, kangilakuqedisisa komuntu.

³Kangifundanga inhlakanipho, kangilwazi ulwazi lwabangcwele.

⁴Ngubani owenyukela emazulwini njalo wehla? Ngubani oqoqe wafumbatha umoya ezandleni zakhe? Ngubani ogoqele amanzi esembathweni? Ngubani omise yonke imikhawulo yomhlaba? Lingubani ibizo lakhe, lebizo lendodana yakhe lingubani, uba usazi?

⁵Lonke ilizwi likaNkulunkulu licwengekile; uyisihlangu kwabaphephela kuye.

⁶Ungengezeleli emazwini akhe, hlezi akukhuze, utholwe ungumqambimanga.

⁷Zimbili izinto engizicele kuwe; ungangigodleli zona ngingakafi.

⁸Susa khatshana lami ize lamazwi amanga; ungangiphi ubuyanga loba inotho; ungiphe ukudla kwesabelo sami.

⁹Hlezi ngisuthe, ngi ku phike ngithi: Ngubani i Nkosi? Kumbe hlezi ngibe ngumyanga, ngintshontshe, ngithathe ngeze ibizo likaNkulunkulu wami.

¹⁰Ungahlebi inceku enkosini yayo, hlezi ikuthuke, ube lecala.

¹¹Kulesizukulwana esi thuka uyise, esingabusisi unina;

¹²isizukulwana esihlambulukileyo emehlweni aso, kodwa esingahlanjululwanga engcekezeni yaso;

¹³isizukulwana omehlo aso aphakeme kangaka, lenkophe zaso ziphakanyisiwe;

¹⁴isizukulwana omazinyo aso zinkemba, lesimazinyo aso omhlathi zingqamu, zokudla abayanga emhlabeni, labaswelayo ebantwini.

¹⁵Umkhaza ulamadodakazi amabili athi: Phana, phana; lezizontathu kazisuthi; ezine kazitsho ukuthi: Kwanele.

¹⁶Ingcwaba, lesizalo esivaliweyo, umhlaba o ngasuthi amanzi, lomlilo o ngathi: Kwanele.

¹⁷Ilihlo e liklolodela uyise, lelidelela ukulalela unina, amawabayi esihotsha azalukopola, labantwana bamanqe bazalidla.

¹⁸Lezizinto ezintathu ziyisimangaliso esikhulu kimi, yebo, ezine engingazaziyo:

¹⁹Indlela yokhozi emazulwini, indlela yenyoka edwaleni, indlela yomkhumbi enhliziyweni yolwandle, lendlela yejaha entombini.

²⁰Injalo indlela yowesifazana oliwule; udla, esule umlomo wakhe, athi: Kangenzanga isiphambeko.

²¹Ngenxa yezinto ezintathu umhlaba uyazamazama, yebo, ngenxa yezine o ngezithwale:

²²Ngenxa yesigqili nxa sibusa, lesithutha nxa sisuthi ukudla,

²³ngenxa yesaliwakazi nxa sendile, lencekukazi nxa iyindlalifa yenkosikazi yayo.

²⁴Lezi ezine zingezincinyane zomhlaba, kanti zihlakaniphile zenziwe zihlakaniphe:

²⁵Ubunyonyo buyisizwe esingelamandla, kanti bulungisa ukudla kwabo ehlobo.

²⁶Imbila ziyisizwe esingelamandla, kanti zimisa indlu yazo edwaleni.

²⁷Intethe kazilankosi, kanti zonke ziphuma zehlukene ngamaviyo.

²⁸Umbankwa ubambelela ngezandla ezimbili, njalo usezigodlweni zenkosi.

²⁹Lezi ezintathu zinyathela kuhle, yebo, ezine zihamba kuhle:

³⁰Isilwane esilamandla phakathi kwenyamazana, esingeyikubuyela emuva ngenxa yobuso loba ngobukabani;

³¹obhince okhalweni, kumbe impongo; lenkosi ileviyo lamabutho.

³²Uba ube yisithutha ngokuziphakamisa, njalo uba ucebe okubi, beka isandla emlonyeni.

³³Ngoba ukuphehlwa kochago kuveza iphehla, lokucindezelwa kwempumulo kuveza igazi, lokucindezelwa kwentukuthelo kuveza ingxabano.