Read Ndebele-IBhayibhili Elingcwele 2006 Izaga 31 Bible Online

Izaga 31 - Ndebele-IBhayibhili Elingcwele 2006 bible

Izaga 31

¹Amazwi kaLemuweli inkosi yeMasa, unina amfundisa wona.

²Ini, ndodana yami! Ini-ke, ndodana yesizalo sami! Ini-ke, ndodana yezithembiso zami!

³Unganiki amandla akho kwabesifazana, kumbe izindlela zakho ekubhubhiseni amakhosi.

⁴Kakusikwamakhosi, Lemuweli, kakusikwamakhosi ukunatha iwayini, kumbe okweziphathamandla ukuloyisa okunathwayo okulamandla.

⁵Hlezi anathe, akhohlwe isimiso, aguqule isahlulelo sawo wonke amadodana enhlupheko.

⁶Phana okunathwayo okulamandla kobhubhayo, lewayini kwabababayo emphefumulweni.

⁷Kanathe, akhohlwe ubuyanga bakhe, angabe esakhumbula usizi lwakhe.

⁸Vulela isimungulu umlomo wakho, udaba lwawo wonke amadodana okwedlula.

⁹Vula umlomo wakho, wahlulele ngokulunga, umele ilungelo lomyanga loswelayo.

¹⁰Ngubani ongathola umfazi okhutheleyo? Ngoba intengo yakhe iyedlula kakhulu amatshe amahle.

¹¹Inhliziyo yomkakhe ithemba kuye, ukuze angasweli impango.

¹²Umenzela okuhle, hatshi okubi, insuku zonke zempilo yakhe.

¹³Udinga uboya bezimvu lefilakisi, asebenze ngenjabulo yezandla zakhe.

¹⁴Ufanana lemikhumbi yomthengisi; uletha ukudla kwakhe kuvela khatshana.

¹⁵Uvuka kusesebusuku, anike indlu yakhe ukudla, lesabelo kuzincekukazi zakhe.

¹⁶Anakane ngensimu ayizuze; ngesithelo sezandla zakhe ahlanyele ivini.

¹⁷Uyabhinca ukhalo lwakhe ngamandla, aqinise ingalo zakhe.

¹⁸Uyananzelela ukuthi ukuthengisa kwakhe kuhle; isibane sakhe kasicitshi ebusuku.

¹⁹Welulela izandla zakhe kuluthi lokuphotha, lezandla zakhe zibambe isigodo esilezintambo.

²⁰Welulela umyanga isandla sakhe, elulele izandla zakhe koswelayo.

²¹Kesabi iliqhwa elikhithikayo ngenxa yabendlu yakhe, ngoba bonke abendlu yakhe bagqokiswe kabili.

²²Uzenzela izembeso; isigqoko sakhe sililembu elicolekileyo leliyibubende.

²³Umkakhe uyaziwa emasangweni, lapho ehlezi labadala belizwe.

²⁴Wenza ilembu elicolekileyo kakhulu, alithengise; anike umthengi ibhanti.

²⁵Amandla lodumo kuyisigqoko sakhe; uyahleka mayelana losuku olulandelayo.

²⁶Uvula umlomo wakhe ngenhlakanipho; lemfundiso yomusa iselimini lwakhe.

²⁷Uqaphela inhambo zomuzi wakhe; kadli isinkwa sobuvila.

²⁸Abantwana bakhe bayavuka bathi ubusisiwe, l omkakhe laye uyamdumisa:

²⁹Manengi amadodakazi enze ngenkuthalo, kodwa wena wenyukile phezu kwawo wonke.

³⁰Ubuhle buyinkohliso, lokubukeka kuyize; owesifazana owesaba i Nkosi yena uzadunyiswa.

³¹Mnikeni okuvela esithelweni sezandla zakhe, lemisebenzi yakhe kayimdumise emasangweni.