Read Ndebele-IBhayibhili Elingcwele 2006 Izaga 4 Bible Online

Izaga 4 - Ndebele-IBhayibhili Elingcwele 2006 bible

Izaga 4

¹Zwanini, bantwana bami, umlayo kayihlo, linanzelele ukuze lazi ukuqedisisa.

²Ngoba ngilinika imfundiso enhle, lingawutshiyi umlayo wami.

³Ngoba bengiyindodana kababa, ngithambile, ngingedwa phambi kukamama.

⁴Wasengifundisa wathi kimi: Inhliziyo yakho kayibambelele emazwini ami; gcina imilayo yami, uphile.

⁵Zuza inhlakanipho, uzuze ukuqedisisa, ungakhohlwa; ungaphambuki emazwini omlomo wami.

⁶Ungakutshiyi, njalo kuzakulondoloza; ukuthande, njalo kuzakulinda.

⁷Okokuqala yinhlakanipho; zuza inhlakanipho; langenzuzo yakho yonke uzuze ukuqedisisa.

⁸Kukhulise, njalo kuzakuphakamisa; kuzakunika udumo nxa ukugona.

⁹Kuzanika ikhanda lakho umqhele womusa; kuzakulethela umqhele wodumo.

¹⁰Zwana, ndodana yami, wemukele amazwi ami, leminyaka yempilo izakuba minengi kuwe.

¹¹Ngikufundisile endleleni yenhlakanipho; ngikwenze wanyathela emikhondweni yobuqotho.

¹²Ekuhambeni kwakho inyathelo lakho kaliyikufinyezwa, njalo nxa ugijima kawuyikukhubeka.

¹³Bambelela ekulayweni, unga ku yekeli; kugcine, ngoba kuyimpilo yakho.

¹⁴Ungangeni emkhondweni wabakhohlakeleyo, ungahambi endleleni yababi.

¹⁵Iyekele, ungedluli ngayo, phambuka kuyo, wedlule.

¹⁶Ngoba kabalali uba bengenzanga okubi; lobuthongo babo buyasuswa uba bengakhubekisanga muntu.

¹⁷Ngoba badla isinkwa senkohlakalo, banathe iwayini lobudlwangudlwangu.

¹⁸Kodwa indlela yabalungileyo injengokukhanya okukhanyayo, kuqhubeka kukhanya kuze kube semini enkulu.

¹⁹Indlela yababi injengomnyama; kabazi ukuthi bazakhutshwa yini.

²⁰Ndodana yami, lalela amazwi ami, ubeke indlebe yakho ekukhulumeni kwami.

²¹Kakungaphunyuki emehlweni akho; ukugcine phakathi kwenhliziyo yakho.

²²Ngoba kuyimpilo kwabakutholayo, lempilo enhle yenyama yabo yonke.

²³Gcina inhliziyo yakho phezu kwakho konke okungagcinwa, ngoba kuvela kikho ukuphuma kwempilo.

²⁴Susa kuwe ukuphambana komlomo, lokuphambeka kwendebe kususele khatshana lawe.

²⁵Amehlo akho kawakhangele phambili, lenkophe zakho ziqonde phambi kwakho.

²⁶Linganisa umkhondo wonyawo lwakho, ukuze zonke indlela zakho ziqine.

²⁷Ungaphambukeli ngakwesokunene kumbe ngakwesokhohlo; uphambule unyawo lwakho ebubini.