Read Ndebele-IBhayibhili Elingcwele 2006 Izaga 5 Bible Online

Izaga 5 - Ndebele-IBhayibhili Elingcwele 2006 bible

Izaga 5

¹Ndodana yami, lalela inhlakanipho yami, beka indlebe yakho ekuqedisiseni kwami,

²ukuze uqaphele ingqondo, lendebe zakho zigcine ulwazi.

³Ngoba indebe zowesifazana wemzini zithonta uluju, lomlomo wakhe ubutshelezi kulamafutha.

⁴Kodwa ukucina kwakhe kuyababa njengomhlonyane, kubukhali njengenkemba esika nhlangothi mbili.

⁵Inyawo zakhe zehlela ekufeni; izinyathelo zakhe zibambelela esihogweni.

⁶Hlezi ulinganise indlela yempilo, imikhondo yakhe iyazulazula, kananzeleli.

⁷Ngakho-ke, bantwana, ngilalelani, lingaphambuki emazwini omlomo wami.

⁸Dedisela indlela yakho khatshana laye, ungasondeli emnyango wendlu yakhe;

⁹hlezi unikele udumo lwakho kwabanye, leminyaka yakho kolesihluku;

¹⁰hlezi abezizwe bazisuthise ngamandla akho, lemitshikatshika yakho ibe sendlini yowezizweni;

¹¹njalo ububule ekupheleni kwakho, lapho inyama yakho lomzimba wakho sekudliwe;

¹²njalo uthi: Ngikuzonde njani ukulaywa, lenhliziyo yami yadelela ukukhuzwa!

¹³Kangizwanga-ke ilizwi labafundisi bami; kangibekanga indlebe zami kwabangifundisayo!

¹⁴Ngaphosa ngaba ebubini bonke phakathi kwebandla lenhlangano.

¹⁵Natha amanzi emgodini wakho, lemifula ephuma phakathi komthombo wakho.

¹⁶Imithombo yakho ichitheke phandle, izifula zamanzi emidangeni.

¹⁷Kakube ngokwakho wedwa, kungabi ngokwabezizweni kanye lawe.

¹⁸Umthombo wakho kawubusiswe; uthokoze ngomfazi wobutsha bakho;

¹⁹impala ethandekayo kakhulu, legogo elibukekayo; amabele akhe kawakusuthise sonke isikhathi, uzule othandweni lwakhe kokuphela.

²⁰Kungani-ke, ndodana yami, uzule kowesifazana wemzini, ugone isifuba sowemzini?

²¹Ngoba indlela zomuntu ziphambi kwamehlo e Nkosi; njalo iyalinganisa yonke imikhondo yakhe.

²²Ezakhe iziphambeko zizabamba omubi, abanjwe zintambo zesono sakhe.

²³Yena uzakufa ngokungalaywa, lebukhulwini bobuthutha bakhe uzaduha.