Read Ndebele-IBhayibhili Elingcwele 2006 Izaga 6 Bible Online

Izaga 6 - Ndebele-IBhayibhili Elingcwele 2006 bible

Izaga 6

¹Ndodana yami, uba uyisibambiso somakhelwane wakho, waqakezela owezizwe isandla sakho,

²uthiywe ngamazwi omlomo wakho, ubanjwe ngamazwi omlomo wakho.

³Yenza lokhu khathesi, ndodana yami, uzophule, lokhu usesandleni sikamakhelwane wakho; hamba, uzithobe, umncengisise umakhelwane wakho.

⁴Unganiki amehlo akho ubuthongo, lokuwozela enkopheni zakho.

⁵Uzophule njengomziki esandleni somzingeli, lanjengenyoni esandleni somthiyi wenyoni.

⁶Yana ebunyonyweni, vila, ubone indlela zabo, uhlakaniphe.

⁷Obuthi, bungelamkhokheli, induna, lombusi,

⁸bulungisa isinkwa sabo ehlobo, bubuthe ukudla kwabo esivunweni.

⁹Koze kube nini, vila, ulele? Uzavuka nini ebuthongweni bakho?

¹⁰Ubuthongo obuncinyane, ukuwozela okuncinyane, ukusonga izandla okuncinyane ukuthi ulale,

¹¹besebusiza ubuyanga bakho njengesihambi, lenswelo yakho njengomuntu olesihlangu.

¹²Umuntu kaBheliyali, umuntu okhohlakeleyo, ohamba lomlomo ophambeneyo,

¹³afice amehlo akhe, akhulume ngenyawo zakhe, afundise ngeminwe yakhe,

¹⁴ukuphambuka kusenhliziyweni yakhe, uceba okubi ngesikhathi sonke, ephosela ingxabano.

¹⁵Ngenxa yalokhu ingozi yakhe izafika masinyane, ahle ephuke, kuze kungabi leselapho.

¹⁶Lezizinto eziyisithupha i Nkosi iyazizonda; yebo, eziyisikhombisa ziyizinengiso emphefumulweni wakhe:

¹⁷Amehlo aphakemeyo, ulimi oluqamba amanga, lezandla ezichitha igazi elingelacala,

¹⁸inhliziyo eceba amacebo amabi, inyawo eziphangisa ukugijimela obubi,

¹⁹umfakazi wamanga ophafuza izinkohliso, lophosela ingxabano phakathi kwabazalwane.

²⁰Ndodana yami, gcina umlayo kayihlo, ungakudeli ukufundisa kukanyoko.

²¹Kubophele enhliziyweni yakho njalo, kubophele entanyeni yakho.

²²Ekuhambeni kwakho kuzakukhokhela, ekulaleni kwakho kukulondoloze, lekuvukeni kwakho khona kukhulume lawe.

²³Ngoba umlayo uyisibane, lokufundisa kuyikukhanya, lokukhuza kokulaya kuyindlela yempilo,

²⁴ukuze kukugcine emfazini omubi, emazwini ayengayo olimi lowesifazana wemzini.

²⁵Ungaloyisi ubuhle bakhe enhliziyweni yakho; angakuthathi ngenkophe zakhe.

²⁶Ngoba ngenxa yomfazi o yisiphingi ungafika ecezwini lwesinkwa, lomfazi womuntu uzingela umphefumulo oligugu.

²⁷Kambe, umuntu angaphatha umlilo esifubeni sakhe, lezigqoko zakhe zingatshi?

²⁸Umuntu angahamba phezu kwamalahle avuthayo, lenyawo zakhe zingatshi yini?

²⁹Unjalo ongena kumkamakhelwane wakhe; wonke omthintayo kayikuba msulwa.

³⁰Kabalideleli isela, nxa liseba ukuthi ligcwalise umphefumulo walo, ngoba lilambile.

³¹Uba litholwa, lihlawula kuphindwe kasikhombisa, linika yonke impahla yendlu yalo.

³²Ofeba lowesifazana uswela ingqondo; owenza lokhu nguye ochitha umphefumulo wakhe.

³³Uzathola ukutshaywa lesigcono, lehlazo lakhe kaliyikwesulwa.

³⁴Ngoba ubukhwele bululaka lomuntu; ngakho kayikuba lasihawu ngosuku lwempindiselo.

³⁵Kayikunanza loba yiyiphi inhlawulo, kayikuvuma lanxa usandisa isipho.