Read Ndebele-IBhayibhili Elingcwele 2006 Izaga 7 Bible Online

Izaga 7 - Ndebele-IBhayibhili Elingcwele 2006 bible

Izaga 7

¹Ndodana yami, gcina amazwi ami, uzibekele imilayo yami.

²Gcina imilayo yami, uphile, lomthetho wami njengenhlamvu yamehlo akho.

³Ukubophele eminweni yakho, kubhale esibhebheni senhliziyo yakho.

⁴Uthi kunhlakanipho: Ungudadewethu; ubize ukuqedisisa ngokuthi yisihlobo sakho;

⁵ukuze kukugcine kumfazi wemzini, kowesifazana wemzini oyengayo ngamazwi akhe.

⁶Ngoba ewindini lendlu yami, ngeminxibo yewindi ngalunguza phandle,

⁷ngasengibona phakathi kwabangelalwazi, ngananzelela phakathi kwabatsha ijaha eliswele ingqondo,

⁸lisedlula esitaladeni eceleni kwengonsi yakhe, linyathela endleleni yendlu yakhe,

⁹kusihlwa, ngentambama yosuku, ebusuku obumnyama, lomnyama.

¹⁰Khangela-ke, owesifazana walihlangabeza, le sembatho sewule, elemfihlo ngenhliziyo.

¹¹Lo wayelomsindo, eyisiqholo; inyawo zakhe kazihlali endlini yakhe.

¹²Khathesi uphandle, abesesiba ezitaladeni, ecathama kuyo yonke ingonsi.

¹³Ngokunjalo walibamba, walanga, waqinisa ubuso bakhe, wathi kulo:

¹⁴Imihlatshelo yeminikelo yokuthula ikimi; lamuhla se ngibhadele izifungo zami.

¹⁵Ngakho-ke ngiphumile ukukuhlangabeza, ngidingisise ubuso bakho; ngikutholile.

¹⁶Ngendlele umbheda wami ngezendlalo, ngamalembu acolekileyo kakhulu alemibalabala avela eGibhithe.

¹⁷Ngifafazile umbheda wami ngemure*, izinhlaba, lekinamoni*.

¹⁸Woza, sizidakise ngothando kuze kuse, sizithokozise ngothando olukhulu.

¹⁹Ngoba indoda kayikho endlini yayo, ihambile uhambo khatshana.

²⁰Ithethe isaka lemali esandleni sayo; ngosuku lwenyanga egcweleyo izakuza endlini yayo.

²¹Walihuga ngobunengi bemfundiso yakhe, walibamba ngamandla ngokuyenga kwendebe zakhe.

²²Lahle lamlandela njengenkabi isiya ekuhlatshweni, lanjengesiphukuphuku sisiya ekujezisweni esongweni lenqagala;

²³uze umtshoko uhlabe isibindi salo, njengenyoni iphangisela esifwini, ingazi ukuthi simelene lempilo yayo.

²⁴Khathesi-ke, bantwana, ngizweni, lilalele amazwi omlomo wami.

²⁵Inhliziyo yakho kayingaphambukeli endleleni zakhe; ungaduhi emikhondweni yakhe.

²⁶Ngoba ubawisele phansi abanengi abalimeleyo, labo bonke ababuleweyo bakhe banengi.

²⁷Indlu yakhe izindlela zesihogo, ezehlela emakamelweni okufa.