Read Ndebele-IBhayibhili Elingcwele 2006 Umtjhumayeli 12 Bible Online

Umtjhumayeli 12 - Ndebele-IBhayibhili Elingcwele 2006 bible

Umtjhumayeli 12

¹Khumbula-ke uMdali wakho ensukwini zobutsha bakho zingakafiki insuku ezimbi, kumbe kusondele iminyaka, lapho ozakuthi: Kangilantokozo ngayo.

²Kungakafiphali ilanga lokukhanya lenyanga lezinkanyezi, kumbe amayezi abuyele emva kwezulu.

³Ngosuku lapho abagcini bendlu bezathuthumela, lamadoda alamandla akhokhobe, labacholayo beme ngoba bebalutshwana, lalabo abalunguza ngamawindi bafiphazeke,

⁴lezivalo zivalwe esitaladini, lapho umsindo wokuchola u su ncipha, lapho ezavuka ekukhaleni kwenyoni, lamadodakazi wonke engoma ezathotshiswa,

⁵la lapho bezakwesaba okuphakemeyo lezesabiso endleleni, lapho isihlahla se-alimondi* sesilempoko, lentothoviyane izakuba ngumthwalo, lesiloyiso sizaphela. Ngoba umuntu uya ekhaya lakhe elilaphakade, labalilayo bazazulazula esitaladeni.

⁶Kungakathukululwa intambo yesiliva, lomganu wegolide ufe, lembiza iphahlazeke emthonjeni, lendirayo yephuke emgodini wamanzi,

⁷lothuli lubuyele emhlabathini njengoba lwalunjalo, lomoya ubuyela kuNkulunkulu owawunikayo.

⁸Ize leze, kutsho umTshumayeli, konke kuyize.

⁹Phezu kwalokho-ke, ngoba umTshumayeli wayehlakaniphile, wayelokhu efundisa abantu ulwazi, yebo wazindla, wadingisisa, wamisa kuhle izaga ezinengi.

¹⁰UmTshumayeli wadinga ukuthola amazwi akholisisayo, lokwabhalwayo kwakuqondile, amazwi eqiniso.

¹¹Amazwi abahlakaniphileyo anjengezincijo, lanjengezipikili ezibethelwe zatshona, amakhosi emihlangano, enikwa ngumelusi munye.

¹²Phezu kwalokho-ke, ndodana yami, xwayiseka: Ekwenzeni ingwalo ezinengi kakulasiphelo, lokufunda okunengi kuyikudinisa inyama.

¹³Kasizwe isiphetho sodaba lonke: Mesabe uNkulunkulu, ugcine imilayo yakhe; ngoba lokho yimfanelo yonke yomuntu.

¹⁴Ngoba uNkulunkulu uzaletha wonke umsebenzi kusahlulelo, layo yonke into efihliweyo, loba kuhle laloba kubi.