Read Ndebele-IBhayibhili Elingcwele 2006 Umtjhumayeli 6 Bible Online

Umtjhumayeli 6 - Ndebele-IBhayibhili Elingcwele 2006 bible

Umtjhumayeli 6

¹Kukhona ububi esengibubonile ngaphansi kwelanga, njalo buvamile ebantwini:

²Umuntu uNkulunkulu amnike inotho lengcebo lodumo ukuze angasweleli umphefumulo wakhe ulutho kukho konke akufisayo, kodwa uNkulunkulu angamniki amandla ukuthi adle kukho, kodwa owemzini uyakudla; lokhu kuyize, njalo kuyisifo esibi.

³Uba umuntu ezala abantwana abalikhulu, aphile iminyaka eminengi, ukuze insuku zeminyaka yakhe zibe zinengi, kodwa umphefumulo wakhe ungasuthiswa ngokuhle, futhi angabi lakungcwatshwa, ngithi umphunzo ungcono kulaye.

⁴Ngoba uza ngeze, uye emnyameni, lebizo lawo lisitshekelwe emnyameni;

⁵futhi kawulibonanga ilanga, kawulalwazi; lo ulokuphumula kulaye.

⁶Yebo, lanxa ephila iminyaka eyinkulungwane, ephindwe kabili, kanti engabonanga okuhle; bonke kabayi yini endaweni eyodwa?

⁷Wonke umtshikatshika womuntu ngowomlomo wakhe, kube kanti inkanuko kayisuthi.

⁸Ngoba ohlakaniphileyo ulani okwedlula isithutha? Ulani umyanga owazi ukuhamba phambi kwabaphilayo?

⁹Kungcono ukubona kwamehlo kulokuzulazula kwenkanuko. Lokhu lakho kuyize lokukhathazeka komoya.

¹⁰Osekukhona sekuke kwathiwa ibizo lakho, njalo kuyaziwa ukuthi kungumuntu, lokuthi kalakho ukuphikisana lolamandla kulaye.

¹¹Ngoba zinengi izinto ezandisa ize; kuyinzuzo bani emuntwini?

¹²Ngoba ngubani okwaziyo okulungele umuntu empilweni, e nani ni lensuku zempilo yakhe eyize ayichitha njengesithunzi? Ngoba ngubani ongatshela umuntu lokho okuzakuba khona emva kwakhe ngaphansi kwelanga?