Read Ndebele-IBhayibhili Elingcwele 2006 U-Isaya 10 Bible Online

U-Isaya 10 - Ndebele-IBhayibhili Elingcwele 2006 bible

U-Isaya 10

¹Maye kwabamisa izimiso ezikhohlakeleyo, lakubabhali ababhala uhlupho;

²ukuphambula abayanga ekwahlulelweni, lokuphanga ilungelo labahluphekayo babantu bami, ukuze abafelokazi babe yimpango yabo lokuthi baphange izintandane!

³Kodwa lizakwenzani ngosuku lwempindiselo, lencithakalweni e zavela khatshana? Lizabalekela kubani ukuthi libe losizo? Lizatshiya ngaphi udumo lwenu?

⁴Ukuze bangakhothami ngaphansi kwezibotshwa, liwele ngaphansi kwababuleweyo? Kukho konke lokhu intukuthelo yayo kayiphenduki, kodwa isandla sayo siseluliwe.

⁵Maye kumAsiriya, intonga yentukuthelo yami, lolaka lwami luyinduku esandleni sabo!

⁶Ngizamthumela isizwe esizenzisayo, ngizamlaya ukumelana labantu bolaka lwami, ukuphanga impango, lokuthumba okuthunjiweyo, ukukubeka kube ngokunyathelwayo njengodaka lwezitalada.

⁷Lanxa yena engakunakani njalo, lenhliziyo yakhe kayicabangi njalo; kodwa kusenhliziyweni yakhe ukuchitha, lokuquma izizwe ezingenlutshwana.

⁸Ngoba uthi: Iziphathamandla zami zonke kazisimakhosi yini?

⁹IKalino kayinjengeKarikemishi yini? IHamathi kayinjengeArpadi yini? ISamariya kayinjengeDamaseko yini?

¹⁰Njengoba isandla sami sithole imibuso yezithombe, ozithombe zayo ezibaziweyo zingcono kule ze Jerusalema lakule ze Samariya;

¹¹njengalokhu ngenzile kuyo iSamariya lezithombe zayo, kangiyikwenza njalo yini kuyo iJerusalema lezithombe zayo?

¹²Kuzakuthi-ke lapho iNkosi isiqedile umsebenzi wayo wonke entabeni yeZiyoni leJerusalema, ngiphindisele isithelo sokuzikhukhumeza kwenhliziyo yenkosi yeAsiriya lobuhle bokuziqhenya kwamehlo ayo.

¹³Ngoba ithe: Ngamandla esandla sami ngikwenzile, langenhlakanipho yami, ngoba ngiyaqedisisa; ngisusile imikhawulo yezizwe, ngaphanga inotho yazo; lanjengeqhawe ngawisela phansi abahlali bazo.

¹⁴Isandla sami sesithole inotho yezizwe njengesidleke; lanjengomuntu ebuthelela amaqanda atshiyiweyo, mina ngibuthelele umhlaba wonke; njalo kwakungekho ophaphazelisa impiko, kumbe ovula umlomo, kumbe otshiyozayo.

¹⁵Ihloka lizazikhukhumeza kuye ogamulayo ngalo yini? Isaha izazikhulisa kuye osaha ngayo yini? Njengokungathi induku inyikinya lowo oyiphakamisayo. Ekuphakanyisweni kodondolo akusisigodo yini?

¹⁶Ngalokhu iNkosi uJehova wamabandla izathumela ukucaka phakathi kwabazimukileyo bayo; langaphansi kodumo lwayo izaphemba ukutshisa njengokutshisa komlilo.

¹⁷Lokukhanya kukaIsrayeli kuzakuba ngumlilo, loNgcwele wakhe abe lilangabi, elizatshisa liqede ameva ayo lokhula oluhlabayo lwayo ngasuku lunye.

¹⁸Liqede lodumo lwehlathi lwayo, lensimu yayo ethelayo, kusukela emphefumulweni kusiya enyameni, njengokucikizeka kwesiguli.

¹⁹Lokuseleyo kwezihlahla zehlathi zayo kuzakuba nlutshwana ngenani, ukuze umntwana akubale.

²⁰Kuzakuthi-ke ngalolosuku insali yakoIsrayeli labaphunyukileyo bendlu kaJakobe kabasayikuqhubeka ukweyama kobatshayileyo; kodwa bazakweyama e Nkosi ni, oNgcwele kaIsrayeli, ngeqiniso.

²¹Insali izabuyela, insali kaJakobe, kuNkulunkulu olamandla.

²²Ngoba lanxa abantu bakho, Israyeli, bengangetshebetshebe lolwandle, kube kanti insali yabo izabuya; ukuchitheka kumisiwe, kuphuphuma ngo kulunga.

²³Ngoba ukubhujiswa okupheleleyo okumisiweyo iNkosi uJehova wamabandla izakwenza phakathi komhlaba wonke.

²⁴Ngakho itsho njalo iNkosi uJehova wamabandla: Bantu bami, elakhe eZiyoni, lingesabi iAsiriya lapho ilitshaya ngenduku, iliphakamisela intonga yayo njengendlela yamaGibhithe.

²⁵Ngoba kuseyisikhatshana nje ukuthukuthela kuzaphela, lolaka lwami ekuchithweni kwabo.

²⁶Njalo i Nkosi yamabandla izabavusela isiswepu, njengokuhlatshwa kweMidiyani edwaleni leOrebi; la njenge ntonga yayo phezu kolwandle ezayiphakamisa njengendlela yamaGibhithe.

²⁷Kuzakuthi-ke ngalolosuku umthwalo wayo usuke ehlombe lakho, lejogwe layo entanyeni yakho, lejogwe lizakwephulwa ngenxa yokugcotshwa.

²⁸Uyeza eAyathi, udabula phakathi kweMigironi, eMikimashi wethula impahla yakhe.

²⁹Badlula esikhaleni, ebusuku bayalala eGeba; iRama iyathuthumela, iGibeya kaSawuli iyabaleka.

³⁰Hlaba umkhosi ngelizwi lakho, ndodakazi kaGalimi! Lizwakalise eLayishi, wena Anathothi elusizana!

³¹IMadimena iyabaleka, labahlali beGebimi badinga isiphephelo.

³²Lamhlanje uzakuma eNobi, anyikinye isandla sakhe emelene l entaba yendodakazi yeZiyoni, uqaqa lweJerusalema.

³³Khangela, iNkosi uJehova wamabandla izaquma ingatsha ngamandla esabekayo, lalabo abaphakeme ngobude bazaganyulelwa phansi, labazikhukhumezayo bazathotshiswa.

³⁴Njalo izagamula izixuku zehlathi ngensimbi, leLebhanoni izakuwa ngolobukhosi.