Read Ndebele-IBhayibhili Elingcwele 2006 U-Isaya 13 Bible Online

U-Isaya 13 - Ndebele-IBhayibhili Elingcwele 2006 bible

U-Isaya 13

¹Umthwalo weBhabhiloni awubonayo uIsaya indodana kaAmozi.

²Phakamisani uphawu entabeni eligceke, libaphakamisele ilizwi, liqhwebe ngesandla, ukuze bangene eminyango yeziphathamandla.

³Mina ngibalayile abangcwelisiweyo bami, ngibizile lamaqhawe ami kuntukuthelo yami, abathokozayo ngobukhosi bami.

⁴Ukuxokozela kwexuku ezintabeni, kungathi ngokwabantu abanengi, umsindo wokuxokozela kwemibuso, kwezizwe ezibutheneyo; i Nkosi yamabandla ibutha ibutho lempi.

⁵Bavela elizweni elikhatshana, emkhawulweni wamazulu, i Nkosi kanye lezikhali zentukuthelo yayo, ukuchitha ilizwe lonke.

⁶Qhinqani isililo, ngoba usuku lwe Nkosi lusondele; njengokuchitheka okuvela kuSomandla luzafika.

⁷Ngenxa yalokhu izandla zonke zizaxega, lenhliziyo yonke yomuntu incibilike;

⁸babesebetshaywa luvalo; imihelo lobuhlungu kubabambe; bafuthelwe njengowesifazana obelethayo; bamangale ngulowo ngomakhelwane wakhe; ubuso babo buyibuso bamalangabi.

⁹Khangelani, usuku lwe Nkosi luyeza, lulesihluku lokufutheka lolaka oluvuthayo, ukubeka umhlaba ube yincithakalo; ibhubhise izoni zawo zisuke kuwo.

¹⁰Ngoba inkanyezi zamazulu lemithala yazo kaziyikukhanyisa ukukhanya kwazo; ilanga lizakuba mnyama ekuphumeni kwalo, lenyanga kayiyikukhanyisa ukukhanya kwayo.

¹¹Ngoba ngizaphindisela ububi phezu komhlaba, laphezu kwabakhohlakeleyo izono zabo; ngiqede ukuzigqaja kwabazikhukhumezayo; ngithobise ukuzikhukhumeza kwabalesihluku.

¹²Ngizakwenza ukuthi indoda ibe ligugu elikhulu kulegolide elicwengekileyo, lomuntu kulegolide leOfiri.

¹³Ngenxa yalokhu ngizazamazamisa amazulu, lomhlaba uzanyikinyeka usuke endaweni yawo, entukuthelweni lwe Nkosi yamabandla, esukwini lokuvutha kolaka lwayo.

¹⁴Kuzakuba njengomziki oxotshwayo, lanjengezimvu okungelamuntu oziqoqayo; bazaphenduka ngulowo lalowo ebantwini bakibo, babalekele ngulowo lalowo elizweni lakhe.

¹⁵Wonke ozatholakala uzagwazwa, lawo wonke ozabanjwa uzakuwa ngenkemba.

¹⁶Labantwana babo bazachotshozwa phambi kwamehlo abo, izindlu zabo ziphangwe, labomkabo badlwengulwe.

¹⁷Khangela, ngizabavusela amaMede, angakhathaleli isiliva; legolide, angathokozi ngalo.

¹⁸Lamadandili awo azachoboza amajaha; njalo kawayikuba lesihawu ngesithelo sesizalo; ilihlo lawo kaliyikuhawukela abantwana.

¹⁹LeBhabhiloni, udumo lwemibuso, ubuhle bokuziqhenya kwamaKhaladiya, izakuba njengokugenqulwa nguNkulunkulu kweSodoma leGomora.

²⁰Kakuyikuba lendawo yokuhlala kuze kube nininini, njalo kayiyikuhlalwa kusizukulwana lesizukulwana; lomArabhiya kayikumisa ithente khona, labelusi kabayikulalisa umhlambi khona.

²¹Kodwa izilo zeganga zizalala khona, lezindlu zayo zizagcwala izilo ezikhonyayo; labantwana bezintshe bazahlala khona, lamagogo aqolotshe khona.

²²Lezimpisi zizaphendulana emanxiweni ayo, lamakhanka ezigodlweni. Lesikhathi sayo siseduze ukufika, lezinsuku zayo kaziyikuphuziswa.