Read Ndebele-IBhayibhili Elingcwele 2006 U-Isaya 14 Bible Online

U-Isaya 14 - Ndebele-IBhayibhili Elingcwele 2006 bible

U-Isaya 14

¹Ngoba i Nkosi izamhawukela uJakobe, imkhethe futhi uIsrayeli, ibabeke elizweni lakibo; lowezizwe uzahlangana labo, njalo bazanamathela endlini kaJakobe.

²Labantu bazabathatha, babese endaweni yabo; lendlu kaIsrayeli izabafuya elizweni le Nkosi, babe yizigqili lezigqilikazi; njalo bazathumba abathumbi babo, babuse abacindezeli babo.

³Kuzakuthi-ke ngosuku i Nkosi ezaliphumuza ngalo ebuhlungwini benu lekuhluphekeni kwenu lemtshikatshikeni onzima ebelisetshenziswa kiwo,

⁴lizaphakamisa lesisaga ngenkosi yeBhabhiloni lithi: Uphele njani umcindezeli! Ubutha sebuphelile!

⁵I Nkosi ilwephule udondolo lwabakhohlakeleyo, intonga yababusi,

⁶owatshaya abantu entukuthelweni ngokutshaya okungapheliyo, owabusa izizwe ngolaka wazingelwa, kungekho onqandayo.

⁷Umhlaba wonke uphumule, ulokuthula; baqhamuka ngo kuhlabelela.

⁸Lezihlahla zefiri ziyathokoza ngawe, imisedari yeLebhanoni, isithi: Selokhu walala phansi, kakulamgamuli owenyukela kithi.

⁹Isihogo ngaphansi siyanyakaziswa ngenxa yakho uku ku hlangabeza lapho usiza, sikuvusela imimoya efileyo, impongo zonke zomhlaba, sisukumise wonke amakhosi ezizwe ezihlalweni zawo zobukhosi.

¹⁰Bonke bazaphendula bathi kuwe: Lawe usubuthakathaka njengathi; usufanana lathi.

¹¹Ubukhosi bakho sebehliselwe esihogweni, ukukhala kwamachacho akho; izimpethu zizakwendlalwa ngaphansi kwakho, lemihlavane ikugubuzele.

¹²Uwe njani uvela emazulwini, wena okhanyayo, ndodana yokusa! Uqunyelwe emhlabathini, wena owawisela phansi izizwe!

¹³Wena wasusithi enhliziyweni yakho: Ngizakwenyukela emazulwini; ngaphezu kwenkanyezi zikaNkulunkulu ngiphakamise isihlalo sami sobukhosi; ngihlale entabeni yenhlangano ezinhlangothini zenyakatho;

¹⁴ngizakwenyukela ngaphezu kwendawo eziphakemeyo emayezini; ngizenze ngifanane loPhezukonke.

¹⁵Kodwa uzakwehliselwa esihogweni, ezinhlangothini zomgodi.

¹⁶Abakubonayo bazakujolozela, bakuqaphele, besithi: Nguye lo umuntu yini owenza ukuthi umhlaba uthuthumele, owanyakazisa imibuso,

¹⁷owamisa ilizwe laba njengenkangala, wachitha imizi yalo, ongavulelanga izibotshwa zakhe ziye ekhaya?

¹⁸Wonke amakhosi ezizwe, wonke alala phansi ngodumo, ileyo laleyo endlini yayo;

¹⁹kodwa wena uphoselwe ngaphandle kwengcwaba lakho, njengehlumela elinengekayo, njenge lembu lababuleweyo, begwazwe ngenkemba, abehlela phansi ematsheni omgodi, njengesidumbu esinyathelelwe phansi.

²⁰Kawuyikuhlanganiswa kanye labo ekungcwatshweni, ngoba ulichithile ilizwe lakini, wabulala abantu bakini. Inzalo yabenzi bobubi kayiyikubizwa kuze kube nininini.

²¹Lungiselani ukubulawa kwabantwana babo ngenxa yobubi baboyise, ukuze bangavuki badla ilifa lelizwe, bagcwalise ubuso bomhlaba ngemizi.

²²Ngoba ngizabavukela, itsho i Nkosi yamabandla, ngiqume kusuke eBhabhiloni ibizo, lensali, lendodana, lomzukulu, itsho i Nkosi.

²³Ngizayimisa ibe yindawo yezinhloni lamatete amanzi, ngiyithanyele ngomthanyelo wencithakalo, kutsho i Nkosi yamabandla.

²⁴I Nkosi yamabandla ifungile isithi: Isibili, njengokucabanga kwami kuzakuba njalo, lanjengokweluleka kwami khona kuzakuma!

²⁵Ukuthi ngimephule umAsiriya elizweni lami, ngimnyathele phezu kwezintaba zami; beselisuka ijogwe lakhe phezu kwabo, lomthwalo wakhe usuke ehlombe labo.

²⁶Lesi yiseluleko eselulekwe ngomhlaba wonke, njalo lesi yisandla eselulelwe izizwe zonke.

²⁷Ngoba i Nkosi yamabandla ikucebile, ngubani-ke ongakuphuthisa? Lesandla sayo seluliwe, njalo ngubani ongasibuyisela emuva?

²⁸Ngomnyaka wokufa kwenkosi uAhazi kwaba lalo umthwalo:

²⁹Ungathokozi, wena wonke Filisti, ngokuthi intonga ekutshayileyo yephukile; ngoba empandeni yenyoka kuzavela ibululu, lesithelo sabo sibe yinyoka ephaphayo etshisayo.

³⁰Lamazibulo abayanga azakwelusela, labaswelayo balale bevikelekile; kodwa ngizabulala impande yakho ngendlala, njalo abulale insali yakho.

³¹Qhinqa isililo, sango, ukhale, muzi. Uncibilike, Filisti, wonke. Ngoba enyakatho kuvela intuthu, njalo kakho oyedwa ngezikhathi zakhe ezimisiweyo.

³²Lezithunywa zesizwe zizaphendulwa ngokuthi ni? Ngokuthi: I Nkosi iyisekele iZiyoni, labahluphekayo babantu bayo bazaphephela kuyo.