Read Ndebele-IBhayibhili Elingcwele 2006 U-Isaya 2 Bible Online

U-Isaya 2 - Ndebele-IBhayibhili Elingcwele 2006 bible

U-Isaya 2

¹Ilizwi uIsaya indodana kaAmozi alibona ngoJuda leJerusalema.

²Kuzakuthi-ke ekupheleni kwezinsuku intaba yendlu ye Nkosi imiswe engqongeni yezintaba, iphakanyiswe phezu kwamaqaqa; lazo zonke izizwe zizajulukela kuyo.

³Lezizwe ezinengi zizahamba zithi: Wozani senyukele entabeni ye Nkosi, endlini kaNkulunkulu kaJakobe, njalo uzasifundisa ngendlela zakhe, sihambe emikhondweni yakhe; ngoba kuzaphuma umlayo eZiyoni, lelizwi le Nkosi eJerusalema.

⁴Njalo izakwahlulela phakathi kwezizwe, ikhuze abantu abanengi; bazakhanda inkemba zabo zibe yimilomo yamakhuba, lemikhonto yabo ibe zingqamu zokuthena izihlahla; isizwe kasiyikuphakamisela isizwe inkemba, kasisayikufunda impi futhi.

⁵Ndlu kaJakobe, wozani sihambe ekukhanyeni kwe Nkosi.

⁶Ngakho ubalahlile abantu bakho, indlu kaJakobe, ngoba bagcwele okwempumalanga, bayizanuse njengamaFilisti, babambana izandla labantwana bezizwe.

⁷Lelizwe labo ligcwaliswe isiliva legolide, njalo kakulakuphela kwenotho yabo; lelizwe labo ligcwaliswe amabhiza, njalo kakulakuphela kwenqola zabo.

⁸Lelizwe labo ligcwaliswe izithombe; bakhothamela imisebenzi yezandla zabo, lalokho iminwe yabo ekwenzileyo.

⁹Lomuntukazana uyakhothama, lomuntu omkhulu azithobe; ngakho kawubaxoleli.

¹⁰Ngena edwaleni, ucatshe othulini, ngenxa yokwesabeka kwe Nkosi, langenxa yodumo lokuphakama kwayo.

¹¹Amehlo aziqhenyayo omuntu azakwehliselwa phansi, lokuzikhukhumeza kwabantu kuzakhothanyiswa, le Nkosi kuphela izaphakanyiswa ngalolosuku.

¹²Ngoba usuku lwe Nkosi yamabandla luzakuba phezu kwakhe wonke ozigqajayo lozikhukhumezayo, lumelane laye wonke oziphakamisayo, njalo athotshiswe;

¹³lumelane layo yonke imisedari yeLebhanoni emide lephakemeyo, lumelane lazo zonke izihlahla zama-okhi* zeBashani,

¹⁴lumelane lazo zonke intaba ezinde, lumelane lawo wonke amaqaqa aphakemeyo,

¹⁵lumelane lawo wonke umphotshongo ophakemeyo, lumelane lawo wonke umthangala obiyelweyo,

¹⁶lumelane layo yonke imikhumbi yeTarshishi, lumelane layo yonke imifanekiso eloyisekayo.

¹⁷Lokuziqhenya kwabantu kuzakhothanyiswa, lokuzikhukhumeza kwabantu kuzathotshiswa, le Nkosi kuphela izaphakanyiswa ngalolusuku.

¹⁸Lezithombe zizaphela du.

¹⁹Bazangena-ke ezimbalwini zamadwala lemihomeni yomhlaba, ngenxa yokwesabeka kwe Nkosi langenxa yodumo lokuphakama kwayo, lapho izavuka ukuqhaqhazelisa umhlaba.

²⁰Ngalolosuku umuntu uzalahlela emagundwaneni lakubolulwane izithombe zakhe zesiliva lezithombe zakhe zegolide abazenzela yena ukuzikhonza,

²¹ukungena emifantwini yamadwala lezingoxweni zamawa, ngenxa yokwesabeka kwe Nkosi langenxa yodumo lokuphakama kwayo, lapho izavuka ukuqhaqhazelisa umhlaba.

²²Lina phezani kumuntu, omphefumulo wakhe usemakhaleni akhe; ngoba unakanwa kukuphi?