Read Ndebele-IBhayibhili Elingcwele 2006 U-Isaya 22 Bible Online

U-Isaya 22 - Ndebele-IBhayibhili Elingcwele 2006 bible

U-Isaya 22

¹Umthwalo wesigodi sombono. Kutheni kuwe khathesi, ukuthi lowo lalowo wakho akhwele empahleni zezindlu?

²Wena ogcwele umsindo, muzi oxokozelayo, dolobho elilentokozo, ababuleweyo bakho kababulawanga ngenkemba, kabafelanga empini.

³Bonke ababusi bakho babaleke kanyekanye, babotshwe ngabatshoki, bonke abatholakala kuwe, babotshiwe kanyekanye, babaleke besuka khatshana.

⁴Ngenxa yalokhu ngathi: Susani amehlo kimi; kangikhale ngokubabayo; ungaphangisi ukungiduduza ngenxa yokuchitheka kwendodakazi yabantu bakithi.

⁵Ngoba kulusuku lokusanganiseka, lolokunyathelela phansi, lolokuphithizela kweNkosi uJehova wamabandla esigodini sombono, lolokudilizela phansi umduli, lokuhlaba umkhosi kuze kube sentabeni.

⁶IElamu yathatha-ke isikhwama semitshoko, kanye lenqola, abantu, abagadi bamabhiza; leKiri yavumbulula isihlangu.

⁷Kuzakuthi-ke izigodi zakho ezikhethekileyo zigcwala izinqola, labagadi bamabhiza bazihlele lokuzihlela ngasesangweni.

⁸Njalo yena uzakwembula isimbombozo sakoJuda; langalolosuku wena uzakhangela izikhali zendlu yehlathi.

⁹Njalo lizabona imikenke yomuzi kaDavida, ukuthi minengi, liqoqe amanzi echibini elingaphansi.

¹⁰Lizabala izindlu zeJerusalema, lidilize izindlu ukuze liqinise umduli.

¹¹Lizakwenza ichibi phakathi kwemiduli yomibili lisenz ela amanzi omgodi omdala. Kodwa kaliyikukhangelanga kowakwenzayo, kalimnanzanga owakubumbayo kudala.

¹²Langalolosuku iNkosi uJehova wamabandla izamemezela ukulila, lokukhala, lokuphucwa kwamakhanda, lokugqokwa kwamalembu amasaka.

¹³Kodwa khangela, injabulo lokuthaba, ukubulawa kwenkomo, lokuhlatshwa kwezimvu, ukudliwa kwenyama, lokunathwa kwewayini; lathi: Asidleni sinathe, ngoba kusasa sizakufa.

¹⁴Kodwa i Nkosi yamabandla yembula endlebeni zami isithi: Isibili lesisono kaliyikusenzelwa inhlawulo yokuthula lize life, kutsho iNkosi uJehova wamabandla.

¹⁵Itsho njalo iNkosi uJehova wamabandla: Hamba uye kulo umphathi, kuShebina, ophezu kwendlu, uthi:

¹⁶Ulani lapha, njalo ulobani lapha, ukuthi uzigebhele ingcwaba lapha, njeng ozigebhela ingcwaba lakhe phezulu, ozigubhela indawo yokuhlala edwaleni?

¹⁷Khangela, i Nkosi izakujikijela khatshana, ngokujikijela kwendoda; izakugoqela ngoku ku goqela,

¹⁸i ku thandele lokukuthandela njengebhola eligiqelwa elizweni elibanzi enhlangothini zombili; uzafela khona, lalapho kuzakuba khona izinqola zakho ezilodumo, wena hlazo lendlu yenkosi yakho!

¹⁹Njalo ngizakusunduza usuke esikhundleni sakho, ikuwise ekumeni kwakho.

²⁰Kuzakuthi-ke ngalolosuku ngibize inceku yami uEliyakhimi indodana kaHilikhiya;

²¹ngizamgqokisa isigqoko sakho, ngimqinise ngebhanti lakho, nginikeze umbuso wakho esandleni sakhe; njalo yena uzakuba nguyise kubahlali beJerusalema lendlini yakoJuda.

²²Ngizabeka-ke isihluthulelo sendlu kaDavida ehlombe lakhe; yena uzavula kungavali muntu, avale kungavuli muntu.

²³Ngizambethela njenge sikhonkwane endaweni eqinileyo; njalo uzakuba yisihlalo sobukhosi esilodumo endlini kayise.

²⁴Bazaphanyeka phezu kwakhe udumo lonke lwendlu kayise, inzalo labantwana, zonke izitsha ezincinyane, kusukela ezitsheni zenkezo kusiya kuzo zonke izitsha zeziphiso.

²⁵Ngalolosuku, itsho i Nkosi yamabandla, isikhonkwane esabethelwa endaweni eqinileyo sizasuswa, siganyulwe siwe; lomthwalo obuphezu kwaso uzaqunywa; ngoba i Nkosi ikhulumile.