Read Ndebele-IBhayibhili Elingcwele 2006 U-Isaya 3 Bible Online

U-Isaya 3 - Ndebele-IBhayibhili Elingcwele 2006 bible

U-Isaya 3

¹Ngoba khangela, iNkosi, uJehova wamabandla, izasusa eJerusalema lakoJuda insika lodondolo, insika yonke yesinkwa, lensika yonke yamanzi,

²iqhawe, lendoda yempi, umahluleli, lomprofethi, umvumisi, lomdala,

³induna yamatshumi amahlanu, lowemukelekayo ngobuso, lomeluleki, lesanuse esihlakaniphileyo, lowazi amalumbo.

⁴Ngizabanika abafana babe yizikhulu zabo, lezihluku zizabusa phezu kwabo.

⁵Labantu bazacindezelwa, omunye komunye, lowo lalowo kumakhelwane wakhe; ijaha lizadelela omdala, lodelelekayo ohloniphekayo.

⁶Lapho umuntu ezabamba umfowabo wendlu kayise athi: Wena ulesembatho, woba ngumbusi wethu, lokhukuchithakala kube ngaphansi kwesandla sakho;

⁷uzaphakamisa ngalolosuku athi: Kangiyikuba ngumelaphi, njalo endlini yami kakulakudla kakulasembatho; lingangimisi ngibe ngumbusi wabantu.

⁸Ngoba iJerusalema ikhubekile, loJuda uwile, ngoba ulimi lwabo lezenzo zabo kumelene le Nkosi, ukuvukela amehlo obukhosi bayo.

⁹Ukukhangeleka kobuso babo kuyafakaza ngabo; bememezela izono zabo njengeSodoma, kabazifihli. Maye kumphefumulo wabo! Ngoba bazenzela okubi.

¹⁰Tshelani olungileyo ukuthi kuzakuba kuhle kuye; ngoba bazakudla isithelo sezenzo zabo.

¹¹Maye kokhohlakeleyo! Kuzakuba kubi kuye; ngoba umvuzo wezandla zakhe uzakwenziwa kuye.

¹²Abantu bami, abacindezeli babo ngabantwana, labesifazana bayababusa. Bantu bami, abakhokheli benu ngabaduhisi, basanganisa indlela yemikhondo yenu.

¹³I Nkosi izimisele ukulabhela, imi ukuthi yahlulele abantu.

¹⁴I Nkosi ingena kusahlulelo labadala babantu bayo leziphathamandla zayo; ngoba lina lidle isivini; impango yomyanga isezindlini zenu.

¹⁵Lilani, lichoboza abantu bami, lichola ubuso babayanga? itsho iNkosi uJehova wamabandla.

¹⁶I Nkosi yasisithi: Ngenxa yokuthi amadodakazi eZiyoni eziphakamisile, ehamba elule intamo, ehuga ngamehlo, ehamba ngokuxoxomela ehamba, ekhencezisa izigqizo enyaweni zawo,

¹⁷ngakho iNkosi izakwenza inkanda yamadodakazi eZiyoni ibe loqweqwe, le Nkosi izanqunula izitho zawo zangasese.

¹⁸Ngalolosuku iNkosi izasusa ubuhle bezigqizo zawo, lezicwatsho, lamasongo anjengenyanga,

¹⁹amacici, lamasongo, lezimbombozo,

²⁰amaqhiye, lezigetsho, lamabhanti, lemifuma, lezintebe,

²¹izindandatho, lamacici amakhala,

²²izigqoko zemikhosi, lamajazi, lezembatho, lezamba,

²³lezibuko, lezigqoko zelembu elicolekileyo kakhulu, lamaqhele, lamaveyili.

²⁴Kuzakuthi-ke endaweni yamakha kube levumba, lendaweni yebhanti kube khona igoda, lendaweni yenwele ezenziwe kuhle kube khona impabanga, lendaweni yesigqoko esihle kube khona amalembu amasaka, ukutsha endaweni yobuhle.

²⁵Amadoda akho azakuwa ngenkemba, lamaqhawe akho empini.

²⁶Lamasango ayo azakhala alile; yenziweze izahlala emhlabathini.