Read Ndebele-IBhayibhili Elingcwele 2006 U-Isaya 37 Bible Online

U-Isaya 37 - Ndebele-IBhayibhili Elingcwele 2006 bible

U-Isaya 37

¹Kwasekusithi inkosi uHezekhiya isi ku zwile, yadabula izigqoko zayo, yazembesa ngelembu lesaka, yangena endlini ye Nkosi.

²Yasithuma uEliyakhimi owayephezu kwendlu, loShebina umabhalane, labadala babapristi bembethe amalembu amasaka, kuIsaya umprofethi indodana kaAmozi.

³Basebesithi kuye: Utsho njalo UHezekhiya: Lolusuku lusuku lohlupho lolokusolwa lolokweyiswa, ngoba abantwana sebefikile ekuzalweni, kanti akulamandla okubeletha.

⁴Mhlawumbe i Nkosi, uNkulunkulu wakho, izawezwa amazwi kaRabi-Shake, onkosi yeAsiriya, inkosi yakhe, emthume ukuthuka uNkulunkulu ophilayo, lokusola ngamazwi i Nkosi uNkulunkulu wakho ewazwileyo. Ngakho phakamisa umkhuleko ngensali etholakeleyo.

⁵Ngakho inceku zenkosi uHezekhiya zafika kuIsaya.

⁶UIsaya wasesithi kuzo: Lizakutsho njalo enkosini yenu: Itsho njalo i Nkosi: Ungesabi amazwi owezwileyo, inceku zenkosi yeAsiriya ezingithuke ngawo.

⁷Khangela, ngizafaka umoya kuyo, njalo izakuzwa ihungahunga, ibuyele elizweni layo; njalo ngizayenza ukuthi iwe ngenkemba elizweni layo.

⁸URabi-Shake wasebuyela, wafica inkosi yeAsiriya isilwa imelene leLibhina; ngoba wayezwile ukuthi isisukile eLakishi.

⁹Wasesizwa ngoTirihaka inkosi yeEtiyopiya kuthiwa: Uphumile uku za kulwa lawe. Esekuzwile wathuma izithunywa kuHezekhiya esithi:

¹⁰Lizakhuluma kanje kuHezekhiya inkosi yakoJuda: UNkulunkulu wakho othembele kuye kangakukhohlisi esithi: IJerusalema kayiyikunikelwa esandleni senkosi yeAsiriya.

¹¹Khangela, wena usuzwile ukuthi amakhosi eAsiriya enzeni kuwo wonke amazwe ngokuwatshabalalisa. Wena-ke uzakhululwa yini?

¹²Onkulunkulu bezizwe bazikhulula yini obaba abazichithayo, iGozani leHarani leRezefi, labantwana beEdeni ababeseTelasari?

¹³Ingaphi inkosi yeHamathi, lenkosi yeArpadi, lenkosi yomuzi weSefavayimi, iHena, leIva?

¹⁴UHezekhiya wasesemukela izincwadi esandleni sezithunywa, wazifunda, wasesenyukela endlini ye Nkosi, uHezekhiya wazichaya phambi kwe Nkosi.

¹⁵UHezekhiya wasekhuleka e Nkosi ni, esithi:

¹⁶Nkosi yamabandla, Nkulunkulu kaIsrayeli, ohlala phakathi kwamakherubi*, nguwe wedwa onguNkulunkulu wayo yonke imibuso yomhlaba; wena wenzile amazulu lomhlaba.

¹⁷Thoba indlebe yakho, Nkosi, uzwe, vula amehlo akho, Nkosi, ubone; uzwe amazwi wonke kaSenakheribi awathumele ukuklolodela uNkulunkulu ophilayo.

¹⁸Isibili, Nkosi, amakhosi eAsiriya achithile zonke izizwe lamazwe azo;

¹⁹aphosela onkulunkulu bazo emlilweni, ngoba babengesibo onkulunkulu, kodwa umsebenzi wezandla zabantu, izigodo lamatshe; ngalokho bababhubhisa.

²⁰Ngakho-ke, Nkosi Nkulunkulu wethu, sisindise esandleni sakhe, ukuze yonke imibuso yomhlaba yazi ukuthi wena wedwa uyi Nkosi.

²¹UIsaya indodana kaAmozi wasethumela kuHezekhiya, esithi: Itsho njalo I Nkosi, uNkulunkulu kaIsrayeli: Ngenxa yokuthi ukhuleke kimi ngoSenakheribi inkosi yeAsiriya,

²²leli yilizwi i Nkosi elikhulume ngaye: Intombi emsulwa, indodakazi yeZiyoni ikudelele, yakuklolodela; indodakazi yeJerusalema inikine ikhanda layo ngemva kwakho.

²³Uklolodele bani wamthuka? Uphakamisele bani ilizwi, waphakamisela amehlo akho phezulu? Umelene loNgcwele kaIsrayeli.

²⁴Uklolodele iNkosi ngesandla sezinceku zakho, wathi: Ngobunengi bezinqola zami mina ngenyukele endaweni ephakemeyo yezintaba, ezinhlangothini zeLebhanoni. Njalo ngizagamula imisedari yayo emide, ikhethelo lezihlahla zamafiri ayo, ngingene ekuphakameni kwemingcele yayo, igusu leKharmeli layo.

²⁵Mina ngigebhe, nganatha amanzi, langengaphansi yenyawo zami ngomisa yonke imifula yezindawo ezivinjelweyo.

²⁶Kawuzwanga yini endulo, ukuthi ngakwenza, ensukwini zendulo, ukuthi ngakubumba? Khathesi sengikwenze kwenzakala, ukuthi ube ngowokudiliza imizi evikelweyo ibe zinqumbi zamanxiwa.

²⁷Ngakho abahlali bayo babe babelesandla esifitshane, besaba babe lenhloni, baba njeng otshani beganga, lemibhida eluhlaza, utshani obuphezu kwezindlu, lamabele atshazwe engakakhuliyo.

²⁸Kodwa ngiyakwazi ukuhlala kwakho, lokuphuma kwakho, lokungena kwakho, lokungithukuthelela kwakho.

²⁹Ngoba ukungithukuthelela kwakho, lokuziqakisa kwakho kwenyukele endlebeni zami, ngakho ngizakufaka umkhala wami emakhaleni akho, letomu lami endebeni zakho, ngikubuyisele ngendlela oweza ngayo.

³⁰Lokhu kuzakuba yisibonakaliso kuwe; lonyaka uzakudla okuzikhulelayo; langomnyaka wesibili umkhukhuzela; kuthi ngomnyaka wesithathu lihlanyele, livune, lihlanyele izivini lidle izithelo zazo.

³¹Lokuphephileyo kwendlu yakoJuda okuseleyo kuzaphinda kugxumeke impande phansi, kuthele izithelo phezulu.

³²Ngoba kuzaphuma eJerusalema insali, lokuphephileyo entabeni yeZiyoni. Ukutshiseka kwe Nkosi yamabandla kuzakwenza lokhu.

³³Ngakho itsho njalo i Nkosi ngenkosi yeAsiriya: Kayiyikungena kulumuzi, kayiyikutshoka umtshoko khona, kayiyikuza phambi kwawo ile sihlangu, kayiyikubuthelela idundulu maqondana lawo.

³⁴Ngendlela eyeza ngayo, ngayo izabuyela, kayiyikungena kulo umuzi, itsho i Nkosi.

³⁵Ngoba ngizawuvikela lumuzi ngiwusindise ngenxa yami, langenxa kaDavida inceku yami.

³⁶Khona kwaphuma ingilosi ye Nkosi, yatshaya enkambeni yamaAsiriya abazinkulungwane ezilikhulu lamatshumi ayisificaminwembili lanhlanu. Kwathi bevuka ekuseni kakhulu, khangela-ke, bonke babeyizidumbu ezifileyo.

³⁷Ngakho uSenakheribi inkosi yeAsiriya wasuka, wahamba ebuyela, wahlala eNineve.

³⁸Kwasekusithi ekhonza endlini kaNisiroki unkulunkulu wakhe, oAdrameleki loSharezeri amadodana akhe bamtshaya ngenkemba, bona baphephela elizweni leArarathi; uEsarihadoni indodana yakhe wasebusa esikhundleni sakhe.