Read Ndebele-IBhayibhili Elingcwele 2006 U-Isaya 40 Bible Online

U-Isaya 40 - Ndebele-IBhayibhili Elingcwele 2006 bible

U-Isaya 40

¹Duduzani, liduduze abantu bami, utsho uNkulunkulu wenu.

²Khulumani kunhliziyo yeJerusalema, limemeze kuyo ukuthi imfazo yayo iphelelisiwe, ukuthi ububi bayo buthethelelwe, ngoba yemukele esandleni se Nkosi okuphindwe kabili ngazo zonke izono zayo.

³Ilizwi lomemezayo ehlane lithi: Lungisani indlela ye Nkosi, limqondisele uNkulunkulu wethu umgwaqo omkhulu enkangala.

⁴Sonke isigodi sizaphakanyiswa, layo yonke intaba loqaqa kuzakwehliswa; lokugobileyo kuzakwenziwa kuqonde, lendawo ezimaxhakaxhaka zibe ligceke.

⁵Inkazimulo ye Nkosi izabonakaliswa, layo yonke inyama i yi bone kanyekanye, ngoba umlomo we Nkosi ukhulumile.

⁶Ilizwi lathi: Memeza! Wasesithi: Ngizamemeza ngithini? Yonke inyama ibutshani, labo bonke ubuhle bayo bunjengeluba leganga.

⁷Utshani buyabuna, iluba liyawohloka, ngoba uMoya we Nkosi uphephetha phezu kwakho; isibili abantu babutshani.

⁸Utshani buyabuna, iluba liyawohloka; kodwa ilizwi likaNkulunkulu wethu limi kuze kube nini lanini.

⁹Wena Ziyoni, oletha izindaba ezinhle, khwela entabeni ende; wena Jerusalema, oletha izindaba ezinhle, phakamisa ilizwi lakho ngamandla, liphakamise ungesabi; tshono emizini yakoJuda uthi: Khangelani, uNkulunkulu wenu.

¹⁰Khangela, iNkosi uJehova izakuza ngamandla, lengalo yayo izayibusela: khangela, umvuzo wayo ilawo, lenkokhelo yayo iphambi kwayo.

¹¹Izakwelusa umhlambi wayo njengomelusi, izabutha amawundlu ngengalo yayo, iwathwale esifubeni sayo, ikhokhele kuhle ezimunyisayo.

¹²Ngubani olinganise amanzi entendeni yesandla sakhe, walinganisa amazulu ngeminwe eyeluliweyo, wahlanganisa uthuli lomhlaba esilinganisweni, walinganisa izintaba ngesikali, lamaqaqa ngezilinganiso?

¹³Ngubani oqondise uMoya we Nkosi, kumbe wamfundisa eng umeluleki wakhe?

¹⁴Yelulekane lobani, owayenza yaqedisisa, wayifundisa endleleni yesahlulelo, wayifundisa ulwazi, wayazisa indlela yokuqedisisa?

¹⁵Khangela, izizwe zinjengethonsi lenkonxa, zibalwa njengothuli lwesikali. Khangela, uphakamisa izihlenge njengento encinyane kakhulu.

¹⁶LeLebhanoni kayeneli ukutsha, lenyamazana zayo kazeneli umnikelo wokutshiswa.

¹⁷Zonke izizwe zinjengezingasilutho phambi kwayo, zibalwa kuyo zingaphansi kokungelutho lokuyize.

¹⁸Lizamfananisa lobani-ke uNkulunkulu, loba mfanekiso bani elizamlinganisa lawo?

¹⁹Ingcitshi incibilikisa isithombe esibaziweyo, lomkhandi wegolide uyasinameka ngegolide, abumbe ngokuncibilikisa amaketane esiliva.

²⁰Lowo ongumyanga ongelamnikelo ukhetha isihlahla esingaboliyo, azidingele umbazi oyingcitshi ukuze alungise isithombe esingayikunyikinywa.

²¹Kalazi yini? Kalizwanga yini? Kalitshelwanga yini kwasekuqaleni? Kaliqedisisanga yini kwasekusekelweni komhlaba?

²²Kunguye ohlala phezu kwesigombolozi somhlaba, labahlali bawo banjengentethe; owendlala amazulu njengekhetheni, awelule njengethente lokuhlala;

²³owenza iziphathamandla zingabi yilutho, enze abehluleli bomhlaba babe njengeze.

²⁴Yebo, kabayikugxunyekwa; yebo, kabayikuhlanyelwa; yebo isiqu sabo kasiyikugxila emhlabathini; laye uzaphephetha phezu kwabo babune; lesivunguzane sibasuse njengamabibi.

²⁵Pho, lizangifananisa lobani, engizafanana laye? kutsho oNgcwele.

²⁶Phakamiselani amehlo enu phezulu, likhangele odale lezizinto, okhipha ibutho lazo ngenani; azibize zonke ngamabizo ngobukhulu bamandla akhe, ngoba eqinile emandleni; kayikho leyodwa esilelayo.

²⁷Utsholoni, wena Jakobe, ukhulume, wena Israyeli ukuthi: Indlela yami isithekile e Nkosi ni lesahlulelo sami sedlule sivela kuNkulunkulu wami?

²⁸Kawazi yini, kawukezwa yini? UNkulunkulu olaphakade, i Nkosi, uMdali wemikhawulo yomhlaba kapheli amandla njalo kadinwa? Kakuphenyeki ukuqedisisa kwakhe.

²⁹Inika amandla abadangeleyo, lakwabangaqinanga yandisa amandla.

³⁰Labatsha bazaphelelwa ngamandla, badinwe, lamajaha azakuwa lokuwa;

³¹kodwa abalindela i Nkosi bazavuselela amandla; bazaqonga ngempiko njengenkozi, bagijime bangadinwa, bahambe bangapheli amandla.