Read Ndebele-IBhayibhili Elingcwele 2006 U-Isaya 45 Bible Online

U-Isaya 45 - Ndebele-IBhayibhili Elingcwele 2006 bible

U-Isaya 45

¹Itsho njalo i Nkosi kogcotshiweyo wayo, kuKurosi, osandla sakhe sokunene ngisibambile ukuze ngehlisele phansi izizwe phambi kwakhe; njalo ngithukulule izinkalo zamakhosi, ukuvula phambi kwakhe amasango alezivalo ezimbili, lamasango angavalwa.

²Mina ngizahamba phambi kwakho, ngenze indawo ezigobileyo ziqonde, ngiphahlaze izivalo zethusi, ngiqume imigoqo yensimbi.

³Ngizakunika okuligugu kobumnyama, lenotho ethukuziweyo yezindawo ezisithekileyo, ukuze wazi ukuthi mina Nkosi, engikubiza ngebizo lakho, nginguNkulunkulu kaIsrayeli.

⁴Ngenxa yenceku yami uJakobe, loIsrayeli umkhethwa wami, ngikubizile ngitsho ngebizo lakho, ngakunika isibongo, lanxa ungangazanga.

⁵Ngiyi Nkosi, njalo kakho omunye, ngaphandle kwami kakulaNkulunkulu, ngikubhincisile lanxa ungangazanga.

⁶Ukuze bazi kusukela lapho eliphuma khona ilanga, njalo kusukela entshonalanga, ukuthi kakho omunye ngaphandle kwami; ngiyi Nkosi, njalo kakho omunye.

⁷Ngibumba ukukhanya, ngidale umnyama; ngenza ukuthula, ngidale ububi; mina Nkosi ngenza zonke lezizinto.

⁸Yehlisani, mazulu, kuvela phezulu, lamayezi athulule ukulunga; umhlaba kawuvuleke, njalo kuthele usindiso, njalo kakuthi ukulunga kumile kanyekanye; mina Nkosi ngikudalile.

⁹Maye kuye ophikisana loMdali wakhe, udengezi lezindengezi zomhlaba! Ibumba lizakutsho yini kolibumbayo ukuthi: Wenzani? kumbe umsebenzi wakho: Kalazandla yini?

¹⁰Maye kuye othi kuyise: Uzalani? kumbe kowesifazana: Ubeletheni?

¹¹Itsho njalo i Nkosi, oNgcwele kaIsrayeli, loMdali wakhe: Buzani kimi ngezinto ezizayo, ngamadodana ami, langomsebenzi wezandla zami liyangilaya.

¹²Mina ngiwenzile umhlaba, ngadala umuntu phezu kwawo; mina, izandla zami zendlale amazulu, ngalawula amabutho awo wonke.

¹³Mina ngimvusile ngokulunga, njalo ngizaqondisa zonke izindlela zakhe; yena uzakwakha umuzi wami, akhulule abathunjiweyo bami, kungengenxa yentengo njalo kungengenxa yesivalamlomo, kutsho i Nkosi yamabandla.

¹⁴Itsho njalo i Nkosi: Umsebenzi weGibhithe, lokuthengiswayo kweEtiyopiya lokwamaShebha, amadoda amade, kuzadlulela kuwe, kuzakuba ngokwakho; bazakulandela, bedlule besemaketaneni, bakhothame kuwe, balabhele kuwe besithi: Isibili uNkulunkulu ukuwe, kakho omunye, kakho omunye uNkulunkulu.

¹⁵Isibili unguNkulunkulu ozifihlayo, uNkulunkulu wakoIsrayeli, uMsindisi.

¹⁶Bazayangeka, ngitsho babe lenhloni, bonke; bazahamba belehlazo kanyekanye ababazi bezithombe.

¹⁷UIsrayeli uzasindiswa e Nkosi ni ngo sindiso olulaphakade; kaliyikuyangeka, kaliyikuba lenhloni, kuze kube nini lanini.

¹⁸Ngoba itsho njalo i Nkosi eyadala amazulu, yona enguNkulunkulu, eyabumba umhlaba yawenza; yona yawumisa, ingawudalelanga ize, yawubumbela ukuze kuhlalwe kuwo, ithi: Ngiyi Nkosi, njalo kakho omunye.

¹⁹Kangikhulumelanga ekusithekeni, endaweni emnyama yomhlaba, kangitshongo kuyo inzalo kaJakobe ukuthi: Ngidingani ngeze. Mina Nkosi ngikhuluma iqiniso, ngitsho izinto eziqotho.

²⁰Buthanani libuye; sondelani kanyekanye, lina elaphunyuka ezizweni; abamisa izigodo zezithombe zabo ezibaziweyo kabazi, abakhuleka kunkulunkulu ongelakusindisa.

²¹Tshelani, li ba sondeze; yebo kabacebisane kanyekanye: Ngubani owazwakalisa lokhu kwasendulo? owakukhulumayo kusukela kulesosikhathi na? Kakusimi i Nkosi yini? Njalo kakho omunye uNkulunkulu ngaphandle kwami, uNkulunkulu olungileyo loMsindisi; kakho ngaphandle kwami.

²²Phendukelani kimi, lisindiswe, lina lonke mikhawulo yomhlaba; ngoba nginguNkulunkulu, njalo kakho omunye.

²³Ngizifungile mina, ilizwi liphumile emlonyeni wami ng okulunga, njalo kaliyikuphenduka, elithi: Lonke idolo lizangiguqela, lonke ulimi luzafunga.

²⁴Ngeqiniso, omunye uzakuthi: E Nkosi ni ngilokulunga lamandla; bazakuza kuyo; kodwa bonke abayithukuthelelayo bazayangeka.

²⁵Yonke inzalo yakoIsrayeli izalungisiswa e Nkosi ni, izincome.