Read Ndebele-IBhayibhili Elingcwele 2006 U-Isaya 5 Bible Online

U-Isaya 5 - Ndebele-IBhayibhili Elingcwele 2006 bible

U-Isaya 5

¹Ake ngihlabelelele othandiweyo wami ingoma yomthandwa wami ngesivini sakhe. Othandiweyo wami ulesivini oqaqeni oluvundileyo.

²Wasibiyela, wakhupha amatshe kiso, wasihlanyela ngevini elikhethiweyo, wakha umphotshongo phakathi kwaso, wagebha lesikhamelo sewayini kiso; walindela ukuthi sizathela izithelo zevini, kodwa sathela izithelo zevini ezimunyu.

³Ngakho-ke, bahlali beJerusalema, lani bantu akoJuda, ake lahlulele phakathi kwami lesivini sami.

⁴Ngabe kwenziwani okunye esivinini sami engingakwenzanga kuso? Ngalindelelani ukuthi sizathela izithelo zesivini, kodwa sathela izithelo zevini ezimunyu?

⁵Ngakho-ke, ake ngilitshele engizakwenza esivinini sami: Ngizasusa uthango lwaso ukuze sibe lidlelo, ngidilize umduli waso ukuze sibe ngesokugxotshwa.

⁶Ngizasenza sibe liganga, singathenwa, singahlakulwa, kodwa kumile ameva lokhula oluhlabayo. Njalo ngizalaya amayezi ukuthi anganisi izulu phezu kwaso.

⁷Ngoba isivini se Nkosi yamabandla yindlu kaIsrayeli, labantu bakoJuda bayisithombo sentokozo zayo. Njalo yayilindele isahlulelo, kodwa khangela, ukuchithwa kwegazi; ukulunga, kodwa khangela, ukukhala.

⁸Maye kulabo abahlanganisa indlu lendlu, abasondeza insimu lensimu, kuze kusweleke indawo, lina lihlale lodwa phakathi kwelizwe!

⁹Endlebeni zami i Nkosi yamabandla yathi: Isibili izindlu ezinengi zizakuba ngamanxiwa, ezinkulu lezinhle zingabi lamhlali.

¹⁰Ngoba indima ezilitshumi zevini zizathela ibhathi* elilodwa, lehomeri* lenhlanyelo lithele i-efa*.

¹¹Maye kwabavuka ekuseni kakhulu, bexotshana lotshwala, balibale kuze kuhlwe, lize libalumathise iwayini!

¹²Ichacho lomhubhe, isigubhu lomhlanga, lewayini kusemadilini abo, kodwa kabananzi isenzo se Nkosi, bengaboni umsebenzi wezandla zayo.

¹³Ngakho abantu bami bazakuya ekuthunjweni ngenxa yokungabi lolwazi, lamadoda abo odumo alendlala, lenengi labo lizakoma ngumhawu.

¹⁴Ngakho ingcwaba lizanabulula umphimbo walo, livule umlomo walo ube banzi ngokungelasilinganiso, kuze kwehle udumo lwabo lobunengi babo lenxokozelo yabo lothokozayo phakathi kwabo.

¹⁵Lomuntukazana uzakwehliselwa phansi, lomuntu ophakemeyo athotshiswe, lamehlo abazikhukhumezayo athotshiswe.

¹⁶Kodwa i Nkosi yamabandla izaphakanyiswa ngesahlulelo, loNkulunkulu ongcwele uzangcweliswa ngokulunga.

¹⁷Lamawundlu azakudla ngokwendlela yawo, labemzini badle amanxiwa abakhulupheleyo.

¹⁸Maye kwabadonsa isiphambeko ngentambo zeze, lesono njengamagoda enqola!

¹⁹Labo abathi: Kaphangise, aphangisise umsebenzi wakhe, ukuze si wu bone; lecebo loNgcwele kaIsrayeli kalisondele lize, ukuze si l azi.

²⁰Maye kwabathi kokubi kuhle, lakokuhle kubi, ababeka umnyama ube yikukhanya, lokukhanya kube ngumnyama, ababeka okubabayo kube mnandi, lokumnandi kube ngokubabayo!

²¹Maye kwabahlakaniphileyo emehlweni abo, labaqedisisayo phambi kobuso babo!

²²Maye kwabangamaqhawe okunatha iwayini, lamadoda alamandla okuhlanganisa okunathwayo okulamandla;

²³abalungisisa okhohlakeleyo ngenxa yomvuzo, basuse ukulunga kwabalungileyo kubo!

²⁴Ngakho njengolimi lomlilo lusidla isidindi sotshani, lamakhoba edilika ngelangabi, ngokunjalo impande yabo izakuba njengokubola, lempoko yabo iphephuke njengothuli; ngoba bewalile umlayo we Nkosi yamabandla, balidelela ilizwi loNgcwele kaIsrayeli.

²⁵Ngenxa yalokho ulaka lwe Nkosi lubavuthele abantu bayo, yelula isandla sayo imelene labo, yabatshaya, izintaba zaze zazamazama, lezidumbu zabo zaba njengengcekeza phakathi kwezitalada. Ngenxa yakho konke lokhu ulaka lwayo kaluphenduki, kodwa isandla sayo silokhu seluliwe.

²⁶Njalo izasiphakamisela isizwe isiboniso ikhatshana, isitshayele ikhwelo isekucineni komhlaba; khangela-ke, sizakuza masinyane ngejubane.

²⁷Kakho ozadinwa, njalo kakho ozakhubeka phakathi kwaso, kakho ozawozela, njalo kakho ozalala, njalo kakho ozakhululelwa ibhanti lokhalo lwakhe, njalo kakho ozaqanyukelwa ngumchilo wamanyathela akhe.

²⁸Omitshoko yakhe ibukhali, lomadandili akhe wonke agotshiwe; amasondo amabhiza akhe azabalwa njengelitshe elilukhuni, lamavili akhe njengesivunguzane.

²⁹Ukubhonga kwakhe uzakuba njengokwesilwane, njalo uzabhonga njengamabhongo esilwane, abhavume abambe impango, ayilethe ekuvikelekeni, njalo kungekho umemuki.

³⁰Bazasibhavumela ngalolosuku njengokubhavuma kolwandle. Uba umuntu ekhangela emhlabeni, khangela-ke, umnyama, usizi, lokukhanya kwenziwe kwaba mnyama ngamayezi aso.